Eth CEGVA artenh uns excellenti resultats en Campionat de Catalunya OPEN de patinatge artistic

cegva--puigcerda.1-JPG

 Ton Cónsul obten dus aurs

Eth torneg, qu’acuelhec era participacion lèu de 100 patinadors e patinadores procedentes deth FC Barcelona, eth CEGVA, eth CEPAP, er Andòrra Club Gèu, eth Club Hielo Jaca e eth CH Bipolo, dèc eth trèt de gessuda diuendres 21 damb es categories Autonomiques B que son es categories mès joenes, entà contunhar eth dissabte damb es categories Autonomiques A, Nacionaus e Internacionaus, es quaus heren eth sòn programa cuert. Fin finau, eth dimenge repetiren participacion es Nacionaus e Internacionaus, qu’aguest còp, mostrèren es sòns programes longui.

En Júnior Isu se proclamèren Campions de Catalunya es patinadors Maeva Gallarda deth CEPAP e er aranés Ton Cónsul, deth FCB, sots Campiona Irene Manau deth FCEH, deth temps qu’en Júnior/Sènior A se pengèren era medalha d’aur era aranesa Cleo España, deth CEGVA, e Alex Abad deth FCB e er argent siguec pera tanben aranesa Marta Badia deth CEGVA e Marc Tort deth FCB. Er aur ena categoria Novice Adv. siguec peth club FCB dera man des patinadors Mònica Carratalà e Aleix Gabara. Es cobles Adv Novice, es campions sigueren Mònica Carratalà e Ton Cónsul deth FCB, deth temps qu’ena categoria cobles Basic Novice, er aur anèc tàs mans des patinadors dera Val d’Aran, Georgina Serrallach e Alexandru Ilici deth CEGVA.

Ena categoria Aleví, se proclamèren Campions de Catalunya era patinadora aranesa Ares Capdevila deth CEGVA e eth patinador deth CEPAP Jan Vilella, deth temps que Mireia Punti, deth madeish club e LLuis Garcia deth FCB sigueren es Campiones de Catalunya ena categoria Benjamí. Eth Basic Novice, era Campiona siguec Anna Bertran deth Puigcerdà. D’ua banda, es patinadores araneses deth CEGVA, Leire España e Ona Masip se pengèren era medalha d’aur enes categories Cadet e 2aua femenina, respectivaments. D’auta banda, es patinadores deth FCB Janna Bernadó e Marta Joly pugèren ath pòdi de Campiones enes categories Debs A Femenin e Debs Femenin, respectivaments. Eric Alis deth Puigcerdà demorèc Campion eth Debs masculin. Per çò qu’ei dera categoria Debutants, eth títol de Campion de Catalunya siguec entara patinadora deth FCB Alexandra Martinez e entath joen patinador aranés deth CEGVA, Martí Alonso, deth temps que Júlia Rodriguez deth FCB se pengèc er aur ena categoria Escola e era aranesa Griselda Serrallach deth CEGVA ena categoria Infantila A.

“En aguest Campionat de Catalunya auem vist era evolucion des participants mès joeni atau coma era progression des participants es categories nacionaus e internacionaus e des dus cobles de liure”, explique eth Cap de Comitè Patinatge, Xavi Manau.

Era pista de gèu de Puigcerdà gaudic des patinadors Mònica Carratalà, Aleix Gabara e der aranés, Ton Cónsul, qu’an estat seleccionadi pera RFEDI entà participar en Campionat Challengue Cup de La Haya (Holanda) eth pròplèu mes de març. Era pròva, que se celebrarà entre eth 5 e eth 8 de març, convòque patinadors joeni mès tanben seniors, que supause era darrèra oportunitat de preparar-se o classificar-se entath Campionat deth Mon que se celebrarà dues setmanes dempús.
ton consul-puigcerda

Comments are closed.