Eth ciclista aranés, Ruben Caseny, comence era que serà era sua prumèra sason complèta coma ciclista professionau, en tot participar aguest dimenge, dia 9 de març, ena ciutat Olandesa de Sint Wilwbort, ena 38au edicion deth trofèu “Rabobank Dorpenomloop Rucphen”.

Eth ciclista aranés ja hec concurréncia pendent tres mesi de pròva en aguesta categoria, integrat en equip de categoria continentau UCI Start-Trigon Cycling Team, en tot èster renauit entara sason 2014. Aguest equip, de licéncia Paraguaiana, disputa pendent es mesi d’iuèrn era sason der America Tour e a compdar deth mes de març eth circuit Europe Tour, a era sua sedença Europèa ena ciutat Bèlga de Gant, en tot disputar principauments es classiques des Païses Basses e centre Euròpa, compde enes sues files damb un aute ciclista espanhòu que Caseny compartirà damb eth equip, eth basc Unai Iparaguirre que proven der equip Euskadi.

Entà Ruben Caseny, “ei important que cada viatge mès, es esportistes aranesi poguen participar en competicions deth mès naut nivèu, en tot demostrar qu’eth supòrt e eth trabalh que se hè damb es esportistes d’Aran da es sòns fruts, en tot perméter que d’aguesta forma poguen promòir es excelléncies dera Val d’Aran entara practica esportiua deth nivèu que sigue”.

Eth passat mes de seteme, Ruben Caseny signèc un convèni de patrocini damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e en es valors der esportista, e der equip deth que hè part, mejançant eth patrocini institucionau de Foment Torisme Val d’Aran.