Eth Conselh Generu d’Aran a realizat ua reestructuracion dera sua ofèrta toristica plaçant era bicicleta com un des pòls mès importants deth sòn Plan de Sostenibilitat Toristica

Seguint es linhes estrategiques establides peth Plan de Sostenibilitat Toristica dera Val d’Aran, eth Conselh Generau a redessenhat era sua ofèrta toristica orientant es sòns esfòrci en desvolopar es estruments de besonh entà poder posicionar eth nòste territòri com ua destinacion de referéncia en sector dera bicicleta.

Era reestructuracion deth producte toristic “bicicleta” conde damb ua serie d’accions dirigides a afavorir eth usatge dera bicicleta coma alternativa sostenible ath transpòrt tradicionau e contaminant, atau com eth impuls d’ua practica esportiua entà toti es publics e que se pòt compaginar perfèctaments damb era rèsta de productes toristics que aufrís era Val d’Aran (Cultura, Gastronomia, Comèrç Locau, entre d’auti)

En aguest sens, era reorganizacion se tradusís en establiment de 4 subproductes que se dividissen en foncion dera modalitat ciclista. Atau trobam 3 modalitats de bicicleta de montanha e ua de bicicleta de carretera.

MTB Gravel e MTB Familiar & Ebike, pensades entà que toti es publics gaudisquen dera montanha en bicicleta, e dempús Trail Enduro, entàs que ja an un shinhau mès de nivèu e cerquen rèptes e emocions mès fòrtes. Es rutes d’aguestes disciplines estan estructurades e 8 sectors ath long d’Aran (Toran, Margalida, Entecada, Baricauba, Salient, Tuca, Mont-Romies i Baqueira), agrupan un totau de 50 propòstes que sumen 1051 km de rutes senhalizades.
Cilcoturisme, rutes pensades tà gaudir damb bicicleta de carretera, trapam 16 pòrts de montanha des quaus 8 son senhalizadi. Apartat que se trebalhe entà aprofitar es oportunitats a niveus de percentatges de pendent qu’aufrís era Val.

Eth establiment d’aguest nau sistèma d’ordenança dera ofèrta ciclista ven dera man dera implantacion d’un nau sistema de senhalizacion de camins e rutes, categorizat emplegat ua escala de colors, que permeterà as usatgèrs seleccionar eth recorregut que vòlen hèr en foncion deth sòn nivèu tecnic, dificultat e longada dera gessuda planificada. Tota aguesta informacion tanben ei disponible enes plataformes digitaus vinculades ath Conselh Generau coma son era pròpia plana web o era aplicacion toristica Guidaran, atau coma plataformes especializades coma Wikiloc o TrailForks.

Athdelà, entà potenciar eth descurbiment e usatge de toti es sectors ciclistes deth parçan, a compdar der 1 d’agost e enquia eth 31 deth madeish mes se introduirà ua linha extra de bus abilitada tàs bicicletes que anarà de Les a Beret, cobrint tota era extension deth territòri.