• Eth govèrn aranés, a trauès des Departaments de Lengua e d’Innovacion, collabòre entara creacion d’un sistèma de reconeishement de votz d’intelligéncia artificiau en aranés laguens deth projècte LINGUATEC-AI

Com especifique ORAI, eth centre de recèrca tecnologica de LINGUATEC-AI, entara creacion de contenguts d’àudio damb intelligéncia artificiau en aranés, ei de besonh eth desvolopament d’un sintetizador de votz.  Mès abans, s’a de bastir un sistèma de reconeishement der aranés (ASR) entath que cau aumens 175 ores d’àudio transcrit damb diuersitat de parlants. D’aguestes ores totaus, ja compdam damb  8 ores enregistrades dera maraton de veus en aranés deth projècte que se desvolopèc en 2022, mès cau 167 ores mès.

Ei per aquerò qu’es Departaments d’Innovacion e de Lengua deth Conselh Generau hèn ua crida as aranesi e araneses que volguen ajudar a neurir damb es sues veus ad aguest sistèma de reconeishement, que vò enregistrar era major varietat possibla de manères de parlar aranés, e per aquerò non cau que sigue era lengua mairau des participants.

Entà arténher un prumèr modèl adaptat, era causa mès importanta ei auer fòrça veus diferentes, mès cap de locutor/a pòt superar eth 2-3 % deth totau de gravacions, ei a díder, un maxim d’1 ora e mieja d’enregistrament per persona.

Entà poder auer aguesta diuersitat, aguest centre tecnologic sollicite qu’es veus complisquen damb un equilibri de genre, que i age locutors/es de totes es edats (<18, 18–29, 30–39, 40–49, 50–59, 60–69, ≥70), de toti es terçons dera Val d’Aran (Naut Aran, Mijaran, Baish Aran) e tanti parlants qu’agen er aranés coma lengua mairau coma de dusau lengua.

Tanben ei important qu’eth tipe de tèxtes que s’enregistren agen estils e registres variadi, ei a díder, que i age àudios de tèxtes literaris, legaus, periodistics, institucionaus, convèrses informaus, etc. Aguesta seleccion l’a hèta eth Departament de Lengua e se facilitarà un tèxte a cada locutor/a.

Entà assegurar un madeish format, se meterà a disposicion un estudi professionau d’enregistrament a on, en foncion dera disponibilitat des participants, se gravarà en blòcs d’1 ora per locutor/a.

Entà aportar era tua votz entath desvolopament deth sistèma de reconeishement d’intelligéncia artificiau en aranés, sonque cau completar aguest formulari: https://forms.cloud.microsoft/e/xtcR2nkeUL que serà disponible enquiath deluns dia 20 d’octobre, tàs 23:45 ores.

Aguesta convocatòria entà arténher mès àudios transcrits en aranés ei part deth projècte LINGUATEC-AI que trabalhe ena implementacion d’intelligéncia artificiau (IA) en naui modèls de lenguatge aplicables a lengües damb pòqui recorsi deth Pirenèu: aragonés, catalan, eusquèra e occitan, qu’includís er aranés.

En aguest sens, eth Govèrn d’Aran s’a involucrat activament en projècte, amassa damb Lo Congrès permanent dera Lengua occitana, entà auançar ena digitalizacion e preséncia dera nòsta lengua pròpria enes mieis digitaus.

 Vielha, 7 d’octobre de 2026