Eth Conselh Generau d’Aran aufrís nauament eth servici de prumèra acuelhuda entà persones nauvengudes

  • Aguest circuit de formacion adreçat entà persones nauvengudes, ei format per tres moduls qu’aufrissen coneishements de lengua, mon laborau e coneishement der entorn, e an coma objectiu dotar ad aguestes persones des esturments basics entà arténher era autonomia en sòn territòri d’acuelhuda

Eth departament d’Igualtat, Salut e Benèster deth Conselh Generau d’Aran, damb eth supòrt deth Servici d’Aucupacion de Catalunya (SOC) e er Hons Sociau Europèu,  amie a tèrme, un an mès, eth servici de prumèra acuelhuda entà nauvenguts ara Val d’Aran, en quau participen ath torn de 40 persones de diferentes nacionalitats. Enguan, pr’amor dera pandèmia dera COVID-19, aguest servici s’a aufrit de forma completament telematica, en tot èster eth prumèr territòri de tota Catalunya en amiar a tèrme aguesta formacion online.

Eth servici de prumèra acuelhuda cònste de tres moduls de formacion diferents que reflectissen era realitat dera Val d’Aran e aufrissen coneishements sus eth mon laborau, era societat aranesa e competéncies basiques der aranés, damb er objectiu de dotar as persones nauvengudes des esturments basics entà arténher era autonomia en territòri.

Pendent es sessions telematiques s’a compdat damb era participacion de diferentes persones relacionades damb diuèrsi airaus dera societat aranesa entà prestar un testimòni reau e dar a conéisher ad aguestes persones nauvengudes diferentes institucions e administracions as que recórrer.

Comments are closed.