Eth Conselh Generau d’Aran cerque solucions viables ara Residéncia Sant Joan de Les

Eth bastiment d’aguest equipament, iniciat ena passada legislatura, s’impulsèc sense compdar damb cap estudi de viabilitat tecnica ne economica que, amassa damb er impacte dera COVID-19, an impossibilitat era sua dubertura
Actuaments, eth Conselh Generau d’Aran estudie possibles solucions entà qu’era Residéncia Sant Joan s’adapte as besonhs reaus deth territòri e dera sua gent grana e que se pogue méter en foncionament çò de mès lèu possible de forma sostenibla economica e sociauments

Era sindica d’Aran, Maria Vergés, acompanhada pes responsables d’Aran Salut e eth Servici Aranés de Benèster e Salut, a visitat aguest maitin era Residéncia de Sant Joan de Les, equipament entath quau eth govèrn d’Aran cerque solucions viables deuant es problematiques que presente.

Eth govèrn deth Conselh Generau d’Aran dejà auie visitat per prumèr còp aguest equipament en mes de junhsèga de 2019, entà conéisher eth sòn estat e poder avalorar era sua dubertura. Totun, pendent tot aguest temps, ath delà des retards ena execucion dera òbra e es inconvenients provocadi pera pandemia, a calut demorar es darrères autorizacions administratives entà poder dar era òbra per entregada, qu’an arribat es passadi dies.

“Pendent era passada legislatura, de 2015 a 2019, eth Conselh Generau d’Aran inicièc eth projècte de bastiment dera Residéncia Sant Joan de Les entara gent grana, mès aguest projècte non compdaue damb cap estudi de viabilitat tecnica ne economica qu’auesse en compde es besonhs reaus deth territòri en aguest airau” explicaue era sindica d’Aran, en tot híger que: “eth còst dera òbra (2.415.000€) sigueren finançadi integrament peth Conselh Generau d’Aran, e non se compdèc damb partida pressupostària entà equipament e mobiliari”.

Era residéncia compde actuauments damb 60 places e era possibilitat d’un convèni damb era Generalitat de Catalunya entath cofinançament des places concertades. Totun, d’acòrd damb çò qu’establís era OMS respècte ath numerò de places de residéncia cada 100 abitants majors de 65 ans, era Val d’Aran presente un rati de 3,1, en tot qu’eth valor aconselhat de cobertura ei d’un 5. Per tant, açò supause un besonh de 72 places que, damb es 44 existentes ena Residéncia Sant Antòni de Vielha, eth deficit teoric ena Val d’Aran ei de 28 places.

Er actuau govèrn deth Conselh Generau d’Aran encomanèc un estudi de viabilitat economica d’aguest equipament a Camon Consulting Group SL. Aguest estudi plantejaue 18 scenaris diferenciadi que contemplauen autant ua modalitat de gestion dirècta a trauès deth SABS e ua externalizacion deth servici, damb era dubertura dera residéncia damb centre de dia o sense e damb diferents nivèus d’ocupacion.

De toti es scenaris plantejadi, cap d’eri balhaue un resultat economic positiu per çò que hè ara gestion dera Residéncia Sant Joan, damb pèrtes que fluctuen entre es 340.000 € e es 40.000 €, en foncion deth tipe de gestion.

Era maxima institucion aranesa recep, per part dera Generalitat de Catalunya, un totau de 1.906.853 € entà atencion sociau, que se despartissen en:

Residéncia St Antòni de Vielha: 1.379.437 €
Servicis d’Atencion Primària: 261.903 €
Centre Aucupacionau: 124.729 €
Atencion Precòça: 56.238 €
Transpòrt adaptat: 32.143 €
SIAH: 30.095 €
Atencion domiciliària: 19.728 €
Violéncia de genre: 2.577 €

Aguesta chifra mos place coma eth territòri deth Pirenèu damb era inversion en atencion sociau mès baisha per part dera Generalitat.

Deuant aguestes donades, eth Conselh Generau d’Aran, a dia d’aué, non a capacitat financèra entà assomir era gestion d’aguest equipament.

“Era realitat sociau e demografica deth nòste territòri ei complèxa, dus de cada tres persones majors de 75 ans non an cap expedient dubèrt enes Servicis Sociaus d’Atencion Primària, çò que demòstre que non coneishem es sues preferéncies sus coma e a on vòlen èster cuedades, ne coneishem s’era sua volontat passe per escuélher un recors residenciau”, manifestaue era sindica d’Aran, que higie “ei per aguest motiu qu’er actuau govèrn deth Conselh Generau a impulsat eth Servici d’Atencion en entorn Domiciari (SAeD), qu’entenem coma un recors essenciau entath territòri, mentre estudiam quin ei eth modèu d’atencion ara gent grana que volem entath nòste país, un modèu qu’a d’auer en compde es sues preferéncies e besonhs e s’a d’ajustar ara sua realitat e ara deth nòste territòri”.

Deuant aguesta situacion, eth govèrn deth Conselh Generau d’Aran, a trauès des servicis d’Aran Salut, trabalhe entà actualizar e ajustar era gestion dera Residéncia Sant Joan entà que, damb finançament europèu e dera Generalitat, esdevengue un servici d’atencion ara ciutadania, que pogue inclodir places de residéncia mès que tanben inclodisque servicis d’atencion ara discapacitat, entre d’auti, entà esdevier un centre integrau d’atencion as persones e que contemple es besonhs de futur dera ciutadania aranesa en totes es sues etapes vitaus.