Eth Conselh Generau d’Aran crompe ua partida de test serologics tà detectar eth nivèu d’inmunizacion des sòns professionaus sanitaris, profesionaus essenciaus e pacients qu’an patit COVID-19

  • Dempús de saber que, peth moment, eth Departament de Salut dera Generalitat non harà extensius aguesti test a professionaus sanitaris ne ara poblacion, eth govèrn deth Conselh Generau d’Aran a decidit aquerir un prumèr lòt d’aguestes pròves a ua empresa omologada tà identificar s’es professionaus (sanitaris e de caractèr essenciau) depenents deth govèrn aranés, an passat ja era malautia, encara que non agen auut simptòmes, e tà identificar ad aqueri pacients diagnosticadi qu’an creat inmunitat deuant deth coronavirus

Eth govèrn deth Conselh Generau d’Aran a aquerit, a trauès d’ua empresa omologada, ua prumèra partida de dus cents test serologics, damb er objectiu de poder detectar s’es professionaus sanitaris e essenciaus depenents deth pròpri Conselh son dejà inmunizadi, e per tant an passat ja eth COVID-19. Autant enes sanitaris coma ena rèsta de professionaus essenciaus depenents deth Conselh Generau d’Aran, aguesta pròva serà de caractèr volontari.

En aguesta madeisha linha, tanben s’amiaran a tèrme aguesti test a toti aqueri pacients qu’an estat ingressadi damb pneumonies e as casi lhèus qu’an estat en isolament domiciliari controladi per airau d’atencion primària, entà poder saber s’an desvolopat inmunitat e per tant an superat era malautia.

Des deth Conselh Generau d’Aran e eth sòn airau sanitari se considère fòrça de besonh poder disposar d’aguesta informacion entà, per un costat, ajustar e reorganizar es trabalhs assistenciaus e, per aute, protegir as professionaus e, en conseqüéncia, ara poblacion.

En aguest sens cau díder que s’a realizat era pròva PCR a toti es residents dera residéncia Sant Antòni, e atau madeish, aguesti tres dies endarrèr, s’an realizat test serologics, enviadi peth Departament de Salut, as pròpris residents e as professionaus dera residencia per exprèssa indicacion deth Departament de Salut dera Generalitat. Aguestes indicacions sonque s’apliquen, exclusivament, a residéncies dera tresau edat (cau rebrembar qu’era PCR ei era pròva que determine s’ua persona ei infectada o non, se realize en laboratòri especializat e a d’èster aprobada peth servici de Vigilància Epidemiologica dera Generalitat).

Per çò que hè as test serologics que se realizaran, e que son es unics des nomentadi “test rapids” que n’aguesti moments se realizen, pòden dar dus tipes de resultats: positiu, que volerà díder qu’era persona a passat era malautia e ja a creat anticòssi, e negatiu, que signifique que non s’a passat era malautia e non a creat anticòssi.

En ua prumèra fasa s’iniciaràn aguesti test damb es pacients dejà nomentadi e se seguirà damb es professionaus.

Entath Conselh Generau d’Aran er hèt de poder identificar as professionaus dejà inmunizadi ei un important pas entà qu’eth sistèma sanitari aranés pogue afrontar en melhors condicions aguesta situacion.

Comments are closed.