Eth sindic d’Aran, Carlos Barrera, e era conselhèra de Torisme e Desvolopament Economic d’Aran, Anna Díaz, arreceberen era setmana passada ar alpinista catalan Òscar Cadiach.

Eth Govèrn d’Aran ratifiquèc eth esponsorizacion dera pròplèu expedicion deth tarragonin ath Broad Peak (8.047 m). Cadiach pòt convertir-se en prumèr catalan en completar es 14 principaus ueit mil deth mon sense utilizar oxigèn artificiau.

Er alpinista tarragonin, damb casa en Vilamòs, tornarà a sajar eth Broad Peak pendent es mesi de junh, junhsèga e agost. Cadiach portarà es emblemes deth Conselh Generau d’Aran enquiara cresta d’aguest ueit mil deth Karakorum e tota era imatge  corporatiua de “Val d’Aran – Era esséncia des Pirinèus” ena indumentària dera expedicion, que pòt alongar-se uns 50 dies.

Era Val d’Aran, destinacion de nauta montanha

Ath delà dera promocion dera Val d’Aran, ara tornada deth Broad er alpinista fomentarà era rota entara Aneto peth vessant aranés, que compde cada còp damb mès seguidors. Eth supòrt de Cadiach a coma objectiu refortilhar era vinculacion dera Val d’Aran damb era nauta montanha.

Cadiach anoncièc que deth grop d’alpinistes internacionaus que compartís damb eth era expedicion, ara arribada deth camp base s’incorporarà Muhammad Ali Sadpara. Er alpinista mès fòrt de Pakistan qu’a dralhat era cresta des ueit mil mès emblematics deth país.

Eth 28 d’agost de 1985, Cadiach siguec amassa damb Antoni Sors e Carles Vallès, eth prumèr alpinista catalan en arténher era cresta der Everest. Cadiach a coronat enquiara 16 crestes que depassen es ueit mil mètres e a estat 26 còps per dessús d’aguesta còta. Damb aguesta naua aventura ath Broad, eth tarragonin ja some 66 expedicions en Imalaia.