• En aplicacion dera modificacion dera Ordenança d’accès motorizat ath medi naturau ena Val d’Aran publicada eth 28 d’agost de 2017, que proïbie era pernoctacion en veïculs ath medi naturau de forma generica, es estaments an acordat agranir era restriccion ara carretèra C-142B d’accès ath Plan de Beret, en tot includir es parcatges dera estacion d’esquí
• Coma alternatiua entà autocaravanes e d’auti veïculs camperizats, s’a abilitat ua part deth parcatge de 1500m, atau coma tanben se pòt pernoctar enes nuclèus urbans e enes zònes perimetrals des carretères C-28 e N-230, damb es condicionants des nòrmes municipaus e de carretères quan serà eth cas

Eth Conselh Generau d’Aran e er Ajuntament de Naut Aran an acordat realizar es accions de besonh entà restringir era pernoctacion ath Plan de Beret, en compliment dera Ordenança d’accès motorizat ath medi naturau.

Eth nombre d’autocaravanes e forgonetes en Plan de Beret a aumentat enes darrèri dètz ans e s’a disparat a compdar dera pandèmia, en tot poder-se compdar mès de 300 veïculs pernoctant pendent es periòdes de vacances enes parcatges d’Orri e Beret. Açò supause ua poblacion lèu establa de mès de 600 persones, damb es problèmes ambientaus qu’açò compòrte en un endret de nauta montanha; des deth sanejament (vàters quimics abocadi enes contenedors de rèsta) er impacte luminic e acostic (musica, cans…) en orari nocturn. Era preséncia contunhada des veïculs parcadi tanben impedís o dificulte era limpiesa dera nhèu des parcatges, enquiath punt qu’es conductors des trèinhèus arrecebien queishes e amenaces per part des usatgèrs des autocaravanes, e disminuís notablaments era capacitat d’aguesti parcatges entà acuélher veïculs.

S’an detectat veïculs estacionats pendent periòdes de diuèrsi mesi qu’èren logadi en sòn parcatge a pè de pistes. Ath delà, per un evident critèri de proteccion civiu, un numerò tan elevat de persones pernoctant enes zònes tan nautes hè mès probabla qu’ua situacion d’emergéncia pogue complicar-se en cas de fòrtes nheuades nocturnes, pr’amor que de Tanau ath Plan de Beret, era carretèra demore soent talhada pes congestacions o peth risc de lauegi.

Aguestes causes hègen recomanable era aplicacion d’aguestes restriccions ath Plan de Beret damb anterioritat, mès s’anèren endarrerint en tot adaptar-se as restriccions post-pandèmia. Fin finau, de forma coordinada entre eth Conselh Generau d’Aran e er Ajuntament de Naut Aran, s’a decidit iniciar un dispositiu conjunt d’Agents de Medi ambient e Mòssos d’Esquadra qu’includís accions informatives, avertiments e tanben era imposicion de sancions, segons eth previst ena Ordenança reguladora d’accès ath medi naturau. Se preve qu’aguestes mesures se mantieràn pendent tot er an.

Vielha, 7 de deseme de 2022