• Eth govèrn d’Aran restaure, en fases successiues, era totalitat des pintures d’aguest monument deth sègle XVII, que narre era Passion e Resurreccion de Crist e qu’encara aué en dia s’installe en autar major dera glèisa de Bossòst cada Dijaus Sant, en tot seguir ua antica tradicion
Eth Conselh Generau d’Aran a finalizat era dusau fasa de restauracion de diuèrses pintures sus tela deth monument de Dijaus Sant dera glèisa dera Mair de Diu dera Purificacion de Bossòst, uns trabalhs amiadi a tèrme pendent era tardor deth 2022.
En aguesta dusau fasa s’an restaurat es dues teles, de gran format (150 x 265 cm) que constituïssen er hons deth monument, representant sus un hons de color blu, era venguda der Esperit Sant en forma de colom entre dus angels que pòrten es esturments dera Passion de Crist. Uns cortinatges enquadren era representacion. Ei previst qu’aguestes pintures restaurades retornen tara Val d’Aran en mes de hereuèr.
Se tracte d’un monument deth sègle XVII, compausat de dotze scènes pintades ath tremp en teles de lin sus bastidors de husta, que narren era passion e resurreccion de Crist.
A despièch qu’ena Val d’Aran se conserven d’auti monuments de Setmana Santa pintadi d’aguesta madeisha epòca, eth monument de Bossòst ei er unic que se seguís montant cada an en presbitèri dera glèisa pendent eth dijaus e diuendres Sant, en tot formar part des celebracions e tradicions de Setmana Santa qu’eth pòble de Bossòst a sabut mantier viues de generacion en generacion.
Aguesta intervencion, prebotjada peth Conselh Generau d’Aran, damb eth supòrt economic deth Departament de Cultura dera Generalitat de Catalunya e dera Deputacion de Lleida, s’a amiat a tèrme enes installacions deth Centre de Restauració de Béns Mobles de Catalunya (CRBMC) en Valldoreix (Barcelona).
Era actuacion, amiada a tèrme pera empresa especializada TdArt Heritage Curators damb un còst de 9.568,68 €, a consistit ena neteja e desinfeccion des bastidors de husta e dera tela, er aplanat e assolidament deth supòrt de husta e tela, era neteja e fixacion dera cocha pictorica e era reintegracion pictorica des pèrtes.
Vielha, 27 de gèr de 2023