-
A trauès d’aguesti concorsi, eth govèrn d’Aran promocione er emplec der aranés ena literatura e era creacion d’òbres audiovisuaus ena lengua pròpria d’Aran, en tot fomentar atau era cultura e era creativitat e apostar peth talent deth nòste territòri
Eth departament de Lengua e Cultura deth Conselh Generau d’Aran a convocat era XXIIIau edicion des Prèmis Aran de Literatura, XXXIIau Prèmis Mn. Condò Sambeat, XVau Concors de Diboish e II Concors de Cuertmetratges en Aranés.
Eth Prèmi Aran de Literatura a tres categories: poesia, narracion e novèlla juvenila e ei adreçat as adults de 18 ans ensús. Sonque s’acceptarà ua òbra per categoria mès ua madeisha persona pòt presentar-se as tres categories.
Eth Concors Literari Mn Condò Sambeat compde damb tres nivèus enes que pòden participar estudiants de 5au e 6au de primària, estudiants d’ESO e estudiants de Bachelierat que non agen complit encara 18 ans. I a dues categories: narracion e poesia, es òbres an d’èster inedites e escrites en aranés.
En çò que tanh ath Concors de Diboish, era tematica d’enguan ei eth cambi climatic e compde damb sies categories:
- 1èr e 2au de primària
- 3au e 4au de primària
- 5au e 6au de primària
- 1èr e 2au d’ESO
- 3au e 4au d’ESO
- Bachelierat e Professionau
En darrèr lòc, eth Concors de Cuertmetratges enguan a coma tematica “Guèrra e Patz”. A coma objectiu promòir un espaci de participacion tà difóner era cultura cinematografica en aranés entre er alumnat des centres d’ensenhament aranesi e entre era poblacion d’Aran en generau damb era realizacion de cuertmetratges e/o òbres audiovisuaus e ath viatge reflexionar sus tèmes d’actualitat. Ei dirigit as centres docents e tanben as associacions o persones qu’i volguen participar.
Entà mès informacion, se pòden consultar es bases d’aguesti concorsi.