Eth vicesíndic prumèr, Luis Carlos Medina, acuelh ara equipa canària, que visite per prumèr viatge era Val d’Aran entà realizar eth stage de pretemporada

Eth Conselh Generau d’Aran a arrecebut as integrants deth Club Basquet Herbalife Gran Canària, que se tròbe en tot realizar un stage de pretemporada ena Val d’Aran. Se tracte deth prumèr viatge qu’eth conjunt canari, capitanejat peth mitic entrenador Aíto García Reneses, visite eth territòri aranés entà preparar er inici dera sason.

Eth vicesindic prumèr, Luis Carlos Medina, oficializèc era recepcion institucionau, en tot arregraïr ara equipa canària per auer escuelhut era Val d’Aran coma destinacion entà preparar-se fisicaments entara sason 2014-15.

“Damb era arribada deth Herbalife Gran Canària, contunham en tot créisher coma destinacion esportiua damb equipes d’elèit der espòrt espanhòu. Èm fòrça contenti qu’un nau conjunt dera Liga ACB prepare era sua sason ena Val d’Aran”, comente eth vicesíndic prumèr, Luis Carlos Medina.

Eth conjunt canari disputèc eth dia 24 un partit amistós en Palai d’Espòrts de Vielha contra eth Morabanc Andòrra, damb eth resultat de 72-85 en favor des andorrans. Eth Herbalife Gran Canària demorarà ena Val d’Aran enquiath pròplèu 27 de seteme.