Eth Conselh Generau d’Aran reformarà eth Refugi dera Honeria

Era adeqüacion deth refugi se fondamente ena melhora des sues condicions programatiques, tecniques, mieiambientaus e de sostenibilitat

Era reforma deth refugi dera Honeria s’includís en objectiu de reequilibri territoriau en Baish Aran deth Govèrn d’Aran

Vielha, 2 de noveme de 2018.- Eth Conselh Generau d’Aran reformarà eth refugi dera Honeria en Canejan laguens eth projècte de valorizacion toristica deth refugi dera Honeria e des camins istorics dera Val de Toran que s’includís en objectiu de reequilibri territoriau en Baish Aran, segontes a explicat eth conselhèr de Territòri d’Aran, José Antonio Boya.

Eth Conselh Generau d’Aran invertirà 400.000€ en aguest projècte, que 200.000€ ne provien d’ua subvencion der impòrt requectat pera Generalitat de Catalonha a trauès dera taxa toristica.

Eth conselhèr de Territòri d’Aran, José Antonio Boya, a manifestat qu’era adeqüacion deth refugi dera Honeria arribe en tot seguir era linha de trabalh mercat peth Conselh Generau d’Aran enes darrèri ans damb era reforma prumèra deth refugi de Saboredo e dempús deth dera Artiga de Lin. Boya, expliquèc qu’era adeqüacion d’aguest refugi s’includís laguens er objectiu de potenciacion d’ua zòna tan importanta entara Val d’Aran coma ei era Val de Toran, a on eth Govèrn d’Aran tanben a amiat a tèrme d’autes accions coma son era melhora des accèssi ath Pic deth Montlude entà convertí’c en un referent de nauta montanha entàs terçons d’Irissa e Quate Lòcs en tot optimizar es sòns valors naturaus e accessibles des de Canejan, Les, Bossòst, Arres e Vilamòs, e per d’auta part era recuperacion deth camin de Canejan.

Es condicions mieiambientaus deth refugi dera Honeria, un còp finalizat era adeqüacion deth madeish, melhoraràn considerablaments gràcies ara utilizacion de materiaus d’escassa mantenença, ath melhor isolament termic de façades e tampes, eth renauiment des installacions e ara incorporacion de sistèmes de captacion d’energia solara qu’ac convertiràn en ua bastissa mès sostenible.

Es trabalhs de reforma deth refugi permeteràn tanben racionalizar er emplec e era distribucion deth refugi, melhorar es condicions d’accessibilitat e d’abitabilitat e ampliar aqueri espacis agudi de besonh de major superfícia.

Comments are closed.