• Es dues campanes, datades en 1886 e 1841, auien de besonh ua intervencion urgenta pr’amor deth mau estat en qué se trapauen es sues joates e batalhs e sigueren transportades, a darrèrs deth mes passat, entà ua empresa especializada d’a on ei previst que tornen a principis d’aguesta tardor

Es dies 27 e 28 de junhsèga s’amièren a tèrme es trabalhs entà despenjar es campanes granes deth campanau de Santa Maria de Vilamòs entà poder-les portar a restaurar e bastir naues joates e batalhs enes talhèrs d’ua empresa especializada, ua intervencion qu’ère fòrça necessària e qu’ei desvolopada peth Conselh Generau d’Aran damb finançament dera Deputacion de Lhèida, damb un còst de 17.304,21€.

Era campana grana, qu’a eth nòm de  Santa Maria e ues dimensions d’1,05 m de diamètre maxim, ath torn d’1 mètre de nautada, e un pes  d’apròp de  600 kg, siguec hèta en 1886 per un honedor de nòm Ballesteros, autor de d’autes campanes ena Val d’Aran.  Ja hè fòrça temps qu’auie era joata e eth batalh en fòrça mau estat e, per aguesta rason, se trapaue immobilizada e assubjectida damb tirants.

Era auta campana, dedicada a Santa Barbara, damb 0,81 m de diamètre  ena boca, 0,86 m de nautada  e un pes aproximatiu de 350-400 kg, date de 1841 e siguec òbra d’Ignasi Jaqueti, un honedor de campanes que tanben trabalhèc en d’auti campanaus aranesi. Era campana tanben auie de besonh un renauiment e er assolidament dera joata e eth batalh.

Ath delà de hèr joates de sustentacion e batalhs naui, era intervencion en talhèr se  completarà damb era neteja dera lordèra e der oxid acumulat enes bronzes e damb ua capa de proteccion. Ei previst qu’es campanes tornen tath sòn campanau a principis dera tardor.

Pr’amor des sues dimensions, pes e peth hèt d’èster a 20 mètres de nautada, s’aueren de baishar deth campanau damb ua grua.