Vielha, 23 de març de 2018.- Eth Conselh Generau d‘Aran mejançant ua subvencion de 49.177,21€ deth Parc Nacional d’Aigüestòrtes e Estany de Sant Maurici amiarà a tèrme ua seria de trabalhs entath condicionament e senhalizacion der entorn e camins d’accès as paratges de Colomèrs e Restanca, atau coma en parcatge de veïculs de Colomèrs.

Eth vicesindic e baile de Naut Aran, Cesar Ruíz Canela, a soslinhat qu’aguesta accion deth Govèrn d’Aran s’includís laguens es accions de consolidacion des dues principaus pistes d’accès en Naut Aran coma son es d’Aiguamòg e Valarties.

En aguest sens Cesar Ruíz Canela a arrebrembat que des der an 2017 eth Conselh Generau d’Aran desvolòpe damb hons provenenti des projèctes FEDER 2014- 2020 accions destinades ara conservacion d’accèssi ar auviatge naturau e culturau dera Val d’Aran consistentes en apariar e recuperar pistes d’accès en airaus naturaus.

En aguest periòde eth Conselh Generau d’Aran destinarà 1.592.000 € ara conservacion d’accèssi ar auviatge naturau e culturau dera Val d’Aran, que 657.000€ ne son provenenti des projèctes deth hons FEDER 2014-2020, entà empréner accions destinades ara recuperacion des accèssi de Vilamòs, ena glèisa de Sant Joan d’Arròs, er accès ath Saut deth Pish, er accès as Uelhs deth Joeu, er accès a Valarties, er accès ar entorn des mines Victòria e Margalida e er accès en Aiguamòg e Parc Nacional d’Aigüestòrtes e Estany de Sant Maurici.

Pera sua part eth sindic d’Aran, Carlos Barrera, a manifestat qu’eth miei naturau, ei un recors toristic de prumèr orde entara Val d’Aran pendent fòrça mesi der an, e qu’aguestes accions s’enquadren ena linha de trabalh deth Conselh Generau d’Aran, que des dera sua restitucion en 1990, e es posteriors traspassi de competéncies en torisme e miei naturau dera Generalitat de Catalonha, a trabalhat entà hèr visitables aguesti espacis e protegir-les. Accions que tanben son implicadi es ajuntaments dera Val d’Aran, proprietaris des pistes forestaus.