Vielha, 2 de març de 2018.- Eth director generau d’Organizacion deth Territòri e Urbanisme, Agustí Serra, e eth sindic d’Aran, Carlos Barrera, an presidit aué ua reünion de trabalh entà detalhar es mecanismes urbanistics de proteccion e recuperacion des bòrdes, es bastiments agricòles e pagesi tradicionaus aranesi.

Pendent era reünion, Agustí Serra, informèc qu’es municipis aranesi modifiquen eth sòn planejament entà adaptar-se as disposicions deth Plan director urbanistic (PDU) dera Val d’Aran envèrs ad aguesti bastiments agricòles e pagesi tradicionaus.

Eth PDU fixe es critèris d’emplec e recuperacion des cabanes araneses entà favorir era sua preservacion, era sua restauracion e velhe entà empedir eth sòn emplec residenciau, e perméter er emplec ludic familhau des proprietaris.

Eth Conselh Generau d’Aran inicièc eth procediment entà modificar es Nòrmes subsidiàries de planejament que regissen as municipis d’Arres, Bausen, Bossòst, Es Bòrdes, Canejan, Les, Vielha, Vilamòs e Naut Aran. Er objectiu ei adaptar aguestes figures d’organizacion urbanistica as directritzes de preservacion des cabanes agricòles contengudes en Plan director urbanistic (PDU) dera Val d’Aran. Pendent eth darrèr an, eth burèu Tecnic deth Conselh Generau d’Aran a trauès deth sòn director e damb supòrt juridic urbanistic, a mantengut ua seria de reünions damb bailes e tecnics municipaus d’Aran entà acordar per consens eth document normatiu que regule er emplec des bòrdes e cabanes pageses tradicionaus, qu’a estat eth motiu dera reünion d’aué.

Eth Departament de Territòri e Sostenibilitat aprovèc eth PDU en mes de junh de 2010 e ac modifiquèc en 2015, entre d’auti, entà fixar es critèris d’emplec e recuperacion des bastiments agroramadères e favorir era sua preservacion entà arrasons arquitectoniques, istoriques, ambientaus, païsatgistiques o sociaus.

Entà impulsar era recuperacion der auviatge rurau, eth PDU velhe entà qu’aguesti bastiments en solèr non urbanizable mantenguen eth caractèr non residenciau e daurís, ath madeish temps, un ventalh de naues possibilitats entà impulsar era sua reconstruccion. Aguesti critèris sigueren acordadi per consens peth Departament de Territòri, es ajuntaments dera Val d’Aran, eth Conselh Generau d’Aran, eth collectiu de tecnics damb preséncia en Aran e era Comission d’Auvitatge der Aran.

Atau, per exemple, es ajuntaments poderàn autorizar es intervencions de manteniment o de conservacion entar emplec ludic o pagés. Es accions de reconstruccion de rèstes d’edificacions existentes, d’autra banda, les aprovarà era Comission territoriau d’urbanisme dera Val d’Aran, depenenta deth Departament de Territòri e Sostenibilitat.

Entà qu’eth planejament municipau s’adapte ath PDU, eth Conselh Generau d’Aran aprovèc iniciauments era modificacion des Nòrmes en 2017. Eth Departament de Territòri e Sostenibilitat da assessorament e supòrt tecnic ad aguest trabalh de revision, e era Comission territoriau d’urbanisme dera Val d’Aran serà era encargada d’aprovar definitiuaments era adaptacion.