Eth Conselh de Govèrn deth CGA, a aprovat aguesta setmana era concession des ajudes e subvencions economiques as joeni esportistes aranesi qu’agen projeccion a un nau nivèu esportiu, damb er objectiu de motivar era contunhitat dera sua carrèra esportiua mentre estúdien, e damb era finalitat que poguen fenir en tot convertir-se en esportistes de naut rendiment.

Foto:FCEH

Es requisits indispensables entà èster beneficiari d’aguestes ajudes èren entre d’auti, corsar ensenhaments obligatòris (ESO) o post obligatòries (Cicles Formatius o Estudis Universitaris), entre es 14 e es 22 ans, èster esportistes en actiu e auer aprovat totes es matèries deth darrèr cors academic.

Entà concedir es subvencions s’an agut en compde es informes dera Comission Tecnica d’Avaloracion, integrada entre auti peth conselhèr d’Espòrts e Joenessa deth Govèrn d’Aran Luís Carlos Medina e peth responsable tecnic deth Conselh Espòrtiu dera Val d’Aran.

S’an concedit dus tipes d’ajudes:

– Bèca A per un impòrt de 1.500 €

– Bèca B per un impòrt de 750 €

Ara ora de concedir aguestes ajudes, s’a considerat era edat des esportistes, atau coma es resultats esportius obtengudi e es desparièrs nivèus de competicion en qu’an participat (grop de competicion internacionau, estatau o autonomica).

En totau s’an concedit 11 subvencions a joeni esportistes aranesi que concorren en esquí de hons, esquí nordic, esquí aupin, esquí freeride, patinatge e ciclisme.