• Damb aguesta pròva pilòt, eth Conselh Generau d’Aran installarà enes escòles de Bossòst e Vielha compostadores electriques que permeten compostar es rèstes organiques en vint-e-quate ores e amiarà a tèrme tanben ua campanha de formacion e accions de conscienciacion entà fomentar era remassada selectiva e, fòrça especiaument, era corrècta separacion des residus organics

Eth govèrn deth Conselh Generau d’Aran impulse ua pròva pilòt d’implementacion de biodigestors de matèria organica en dus centres educatius dera Val d’Aran, concretament era Escòla Sant Ròc de Bossòst e era Escòla Garona de Vielha.

“Damb aguest projècte adequaram es espacis a on an d’anar installadi aguesti biodigestors, que son ua sòrta de compostadores electriques que permeten compostar es rèstes organiques en vint-e-quate ores, e amiaram tanben ua campanha de formacion  e accions de conscienciacion entà fomentar era remassada selectiva e, fòrça especiaument, era corrècta separacion dera matèria organica”, apuntaue eth conselhèr de Gestion Ambientau e Transicion Energetica, Oriol Sala, en tot híger que: “a trauès d’accions coma aguesta, eth govèrn d’Aran vò sajar de melhorar es donades de generacion de residus, entà auançar entà un futur mès verd e sostenible”.

Aguest projècte s’amie a tèrme damb eth supòrt dera Agéncia Catalana de Residus, qu’a autrejat ath govèrn d’Aran ua ajuda de mès de 300.000 €.