• Eth Conselh Generau d’Aran a trabalhat en aguest projècte es darrèri tres ans dera man deth GRM de Pompièrs Emergéncies, eth HUB d’Innovacion Rurau HèPic damb eth supòrt e acompanhament d’expèrts
Era sindica d’Aran, Maria Vergés, amassa damb eth coordinador deth HUB Val d’Aran, Guillem Piris, eth cap deth Grop de Rescat de Montanha de Pompièrs Emergéncies, Juan Miguel Riu e er enginhaire aeronautic e pilòt, Eduardo Puente, an presentat aguest maitin ena sedença deth Conselh Generau d’Aran eth projècte tà dotar a Aran d’un Centre de Formacion en Rescats de Montanha.
Aguest projècte nèish deth trabalh conjunt entre eth Grop de Rescats de Montanha de Pompièrs, eth HUB HèPic deth Conselh Generau d’Aran e diuèrsi expèrts ena matèria que, pendent es darrèri 3 ans, an trabalhat enes diuèrsi àmbits de besonh entà definir eth projècte autant a nivèu economic, coma tecnic e de gestion, en tot realizar un estudi de viabilitat a trauès d’ua empresa especializada qu’a mostrat qu’eth projècte ei rentable e possible.
Un Centre de Formacion SAR (Centre de Recèrca e Rescat), ei un centre de simulacion de rescat damb elicòpter a tamanh reau, a on se pòden simular es maniòbres de rescat en ua nau (elicòpter). En Euròpa sonque i a un centre damb aguest tipe de formacion e caracteristiques plaçat en Bad Tölz, Alemanha.
Er objectiu d’aguest equipament ei eth de crear un centre integrau de formacion, autant entà rescatadors/es e activitats de montanha, coma entà quinsevolh besonh derivat de vòls en elicoptèr.
“Entad açò, se compdarie damb un simolador d’operacions SAR que contemple tecnologia punta a nivèu mondiau entara simolacion d’operacions que permeterie ad aguest centre èster un punt de trobada a nivèu nacionau en matèria d’innovacion en operacions, protocòls e actuacions a trauès de mieis aerians” manifestaue Juan Miguel Riu, cap deth GRM de Pompièrs Emergéncies, en tot híger que “eth centre de formacion preten compdar damb programes de formacion especializadi en encastre dera montanha, instalacions disponibles tara formacion costumizada en matèria de vòls en elicoptèr, e d’auti tipes de formacions coma rescats en telecabina, soterradi…”
En aguest sens, Eduardo Puente, engenhaire aeronautic e pilòt, explicaue que “eth centre se plantege ath torn de tres èishi principaus: eth dera seguretat pr’amor qu’aguest format permet mès ores de practica sense depéner des condicionants extèrns, eth d’èster ua infraestructura sostenibla ambientauments pr’amor dera reduccion d’emissions CO2 en aguestes formacions, e eth der estauvi economic ores d’elicòpter”
Eth projècte prevé ua inversion d’ath torn de 8 milions d’euros e era participacion de diuèrsi agents, autant publics coma privadi, coma ei eth Conselh Generau d’Aran mès tanben d’autes administracions pera sua importància a nivèu estatau e tanben inversions privades.
Eth Centre ei adreçat a toti es grops de Rescats de Montanha, de quinsevolh administracion publica o operadors privats e actuauments se trabalhe ja en dessenh deth projècte tecnic e des requisits administratius entath sòn bastiment.
Entara sindica d’Aran, Maria Vergés, aguest ei un projècte fòrça important “ qu’a de perméter plaçar era Val d’Aran coma referent en àmbit deth rescat de montanha e, a trauès dera innovacion, ajudar tanben ara diversificacion economica en tot posicionar-mos coma un territòri innovador e capable” en tot híger que “deth Conselh Generau d’Aran ençà, a trauès des sòns promotors, èm en contacte damb toti es estaments implicadi en aguest tipe de projèctes que dejà an mostrat eth sòn interès e damb es que se trabalhe ena execucion deth projècte e dera sua posteriora gestion”.
Vielha, 3 d’abriu de 2023