Eth govèrn d’Aran reclame ara Generalitat coordinacion e consens ena redubertura d’activitats tara tempsada d’iuèrn

  • Era sindica d’Aran, Maria Vergés, a convocat aguesta tarde ua amassada urgenta damb es conselhèrs d’Economia, Torisme e Promocion Economica, Juan Antonio Serrano e Josep Canut, eth president deth Grèmi d’Ostalaria dera Val d’Aran e eth director gerent de Baqueira Beret entà avalorar eth brolhon deth plan de dubertura progressiva dera activitat redactat pera Generalitat de Catalunya

  • Aguest plan, que lamentablament non a compdat damb era participacion deth Conselh Generau d’Aran e, per tant, non considère era especificitat deth nòste territòri, non contemple eth lheuament dera restriccion de mobilitat tà entrar e gésser de Catalunya, çò qu’afectarie fòrça negativament ara economia aranesa

Era sindica d’Aran, Maria Vergés, acompanhada pes conselhèrs d’Economia, Torisme e Promocion Economica, Juan Antonio Serrano e Josep Canut, s’a amassat d’urgéncia damb eth president deth Grèmi d’Ostalaria dera Val d’Aran e eth director gerent de Baqueira Beret, entà tractar sus eth brolhon deth plan de desescalada entath dauriment d’activitats pr’amor deth COVID-19.

“Des deth Conselh Generau d’Aran lamentam era manca d’interlocucion damb era Generalitat de Catalunya en aguest ahèr, pr’amor qu’eth govèrn aranés non a estat tengut en compde ara ora d’avalorar er impacte des mesures que se prepausen en aguest brolhon”, manifestaue era sindica d’Aran e higie que “tot e compréner qu’era prioritat a d’èster era sanitària, èm fòrça preocupadi pr’amor qu’eth plan elaborat pera Generalitat non contemple lheuar era restriccion d’entrada e de gessuda de Catalunya en cap des quate trams de dubertura previsti”, assegure era sindica d’Aran, en tot híger que: “de confirmar-se aguesta decision, afectarie fòrça negativament ara economia dera Val d’Aran, qu’ena sua majoria se base en sector toristic e de servicis, que pòrten temps adequant es sòns negòcis ara actuau situacion epidemiologica”.

Cau rebrembar qu’eth Conselh Generau d’Aran constituïc ua taula de trabalh damb eth sector, formada per representants dera ostalaria e de Baqueira Beret, qu’a estat trabalhant pendent es darrèri mesi entà coordinar toti es protocòls e accions de besonh entre es airaus sanitaris e toristiceconomics.

En aguest sens, eth conselhèr Serrano a volut manifestar que: “atau coma a remercat era sindica d’Aran pendent era amassada, eth govèrn deth Conselh Generau d’Aran balhe tot eth sòn supòrt ath sector toristic aranés qu’a amiat a tèrme un gran trabalh entà adaptar es servicis que s’aufrissen pendent er iuèrn as mesures establides pes autoritats competentes entà hèr front ara situacion actuau”.

Comments are closed.