Vielha, 21 de mai de 2019.- Eth Plen deth Conselh Generau d’Aran, celebrat aué en Session Extraordinària, a aprovat per unanimitat era modificacion dera relacion de lòcs de trabalh deth personau ath servici deth Conselh Generau d’Aran entar exercici 2019, çò que signifique:
- Crear es següents lòcs de trebalh dera plantilha de personau:
Director tecnic (Major) de Pompièrs e Adjunt a direccion tecnica de prevencion, escandiments de huecs e sauvaments.
Era estructura deth nau modèl de gestion d’Emergéncies en Aran, ja creada en aguesti darrèri mesi, nomentada Pompièrs Emergéncies, includís es servicis de Transpòrt Sanitari, Prevencion e Escandiment de huecs, Rescats en Montanha e Proteccion Civila, donques, un modèl singular de gestion integrau des emergéncies en Espanha.
Pendent un periòde transitòri eth Conselh Generau d’Aran crearà de forma periodica (4 ans) era sua estructura, de recorsi umans, coma de renauiment e aquesiment de veïculs e equipaments. Dempus d’aguest periòde eth Conselh Generau desvoloparà pleaments es sues competéncies que li autrege era Lei d’Aran en aguesta matèria.
En periòde transitòri, eth comandament correspon a un foncionari damb era categoria d’inspector deth còs de pompièrs dera Generalitat de Catalonha, e qu’eth Conselh arreconeish damb era denominacion de Major, que depenerà organicaments dera Generalitat de Catalonha e funcionauments deth Conselh Generau d’Aran, pendent aguest periòde transitòri.
Un còp superat eth periòde transitòri e incorporat eth personau depenent deth Conselh Generau d’Aran, era figura de Major requeirà en un foncionari deth Conselh Generau adscrit a Pompièrs Emergéncies.