• Eth projècte Prometheus, en quau participe eth Conselh Generau d’Aran, preten contribuir ara continuitat deth reconeishement des hèstes deth huec des Pirinèus coma Patrimòni Culturau Immateriau dera UNESCO

Es ueit sòcis deth projècte Interreg POCTEFA Prometheus, coordinat pera Universitat de Lhèida (UdL), an priorizat era accion de creacion d’un musèu virtuau (eth Prometheus Museum), que remasse es hèstes deth huec e halhes des Pirenèus enes territòris enes quaus se celèbren.

Era version definitiva d’aguest musèu virtuau, que desvolòpen era Universitat de Barcelona (UB), er Institut Occitan de Cultura (CIRDOC) e era Université de Perpignan Via Domitia (UPVD), serà presta en 2021 mès dejà se pòt visitar ua prumèra version.

Eth professor d’Antropologia e Museologia dera UB, Xavier Roigé, afirme que: “aguest espaci non serà ne ua plana web ne un recuelh de documentacion, senon un espaci participatiu a on preservar era hèsta e dar-li continuitat”.

Prometheus ei eth projècte sus es Hèstes deth Huec des Solsticis enes Pirenèus. Compde damb ueit sòcis: eth Conselh Generau d’Aran, eth departament de Cultura dera Generalitat, eth govèrn d’Andòrra, eth patronat de Promocion Economica dera Deputacion de Lhèida, eth CIRDOC, era UPVD, era UB e era Catedra Educacion e Auviatge Immateriau des Pirenèus dera UdL.

Eth projècte Prometheus, qu’ath delà dera creacion d’aguesta web contemple tanben eth dessenh d’ua app mobil, eth desvolopament de materiaus pedagogics innovadors en marc des TIC, era celebracion d’ua convencion internacionau entre d’autes accions, preten contribuir ara continuitat deth reconeishement des hèstes deth huec des Pirinèus coma Patromòni Culturau Immateriau dera UNESCO.

Aguest projècte ei cofinançat en un 65% peth Hons Europèu de Desvolopament Regionau (FEDER) a trauès deth programa POCTEFA, que cerque refortilhar era integracion economica e sociau dera zòna transfronterèra d’Espanha, França e Andòrra.