Vielha, 21 de seteme de 2017.- Eth sindic d’Aran, Carlos Barrera, acompanhat dera conselhèra de Torisme e Desvolopament Economic d’Aran, Anna Díaz, a arrecebut en Conselh Generau d’Aran ath responsable dera delegacion d’ACCIÓ en Naut Pirenèu e Aran, David Torrelles.

Era reünion a servit tà oficializar ena Val d’Aran era metuda en marcha dera delegacion e hèr conéisher totes es possibilitats qu’aufrís aguest estament dera Generalitat as emprenedors d’Aran.

Era delegacion d’ACCIÓ en Naut Pirenèu e Aran a er objectiu d’impulsar era internacionalizacion e era innovacion des enterpreses dera zòna, contribuïr ar aument deth pes dera indústria era economia locau e atrèir naues inversions productiues tath territòri.
Era implantacion d’aguesta delegacion arrespon ara volontat d’aufrir eth maximal de proximitat as pimes e d’adaptar-se as realitats empresariaus deth territòri, qu’en cas deth Naut Pirenèu e Aran manten un teishut empresariau format per 3.561 enterpreses des sectors dera ostalaria, eth comèrç, eth bastiment, es indústries manufactureres, era agricultura e era ramaderia, principauments.

ACCIÓ permet ath delà as enterpreses dera Val d’Aran connectar de manèra dirècta damb es 39 Burèus Exteriors de Comèrç e Inversions dera Generalitat en mon, qu’actuauments compden damb un encastre d’accion de 110 mercats.
Es servicis que s’aufrissen des d’ACCIÓ son ajudes tath finançament, internacionalizacion e era innovacion tecnologica, entre d’auti.

Tota era informacion en http://accio.gencat.cat/cat/empresa-ACC1O/delegacions/alt-pirineu-aran.jsp