·      Ena entrevista damb eth president Torra, ara que tanben an assistit era conselhèra dera Presidéncia, Meritxell Budó, e eth secretari d’Administracions Locaus e de Relacions damb Aran, Miquel Àngel Escobar, s’an plantejat es diuèrsi rèptes qu’a d’afrontar Aran coma era proteccion der aranés e es besonhs urgents en matèria de sanitat

·      Pendent era amassada damb eth president Torrent s’an tractat ahèrs capdaus tà Aran coma era compareishença periodica deth sindic d’Aran en Parlament, atau coma mèrque era Lei d’Aran, e eth seguiment d’aqueres leis e normatives qu’afècten ath país

Eth sindic d’Aran, Fracés Boya, e era vicesindica, Maria Vergés, s’an amassat aguest maitin damb eth president deth Parlament de Catalonha, Roger Torrent, e, posteriorament, damb eth president dera Generalitat, Quim Torra.

Pendent era amassada en Palau dera Generalitat, an estat presents tanben era conselhèra dera Presidéncia, Meritxell Budó, e eth secretari d’Administracions Locaus e de Relacions damb Aran, Miquel Àngel Escobar. Eth sindic e era vicesindica d’Aran an plantejat ath president Torra es dificultats que trauèsse en aguest moment era sanitat aranesa, qu’a de besonh, per un costat, recuperar eth pressupòst de besonh tath sòn foncionament e, ath madeish temps, afrontar ua importanta inversion ena actualizacion des equips e des espacis medicaus.

Atau madeish, ena reunion s’a abordat tanben era implementacion deth nau sistèma de finançament e era partida corresponenta ar increment salariau deth personau laborau deth Conselh Generau d’Aran (418.028,32 euròs), ara demora dera aprobacion deth pressupòst dera Generalitat de Catalonha, que permete aplicar aguest nau sistèma de finançament.

Per un aute costat, s’an abordat es tèmes relacionadi damb er aranés e era sua proteccion e potenciacion. En aguest sens, s’a reclamat qu’eth Departament d’Ensenhament dera Generalitat desvolòpe dejà, entre d’auti ahèrs, eth curriculum d’educacion primària en aranés. Atau madeish, s’a plantejat desplegar ua estrategia que permete implementar era preséncia der aranés enes mieis de comunicacion locaus, ath temps d’impulsar era creacion de contenguts culturaus en aranés.

Ena visita en Parlament, eth sindic a metut de manifèst era importància de qu’eth Conselh Generau sigue present en Parlament e que, atau coma mèrque era Lei d’Aran, eth sindic compareishe de forma periodica ena Cramba catalana entà informar dera evolucion der autogovèrn aranés.

Atau madeish, s’a sollicitat poder amiar a tèrme un seguiment des leis que pòden afectar ara Val d’Aran entà milhorar era gestion e aplicacion des madeishes en territòri.

Entath sindic Boya, aguestes amassades an “ua grana transcendéncia pr’amor que deth sòn resultat en depen era eficàcia e qualitat des servicis publics que gestione eth Conselh Generau d’Aran e que depenen deth finançament dera Generalitat de Catalonha, atau coma era milhora der autogovèrn aranés”.

Andús presidents an estat obsequiadi per part des representants aranesi damb ua colleccion de libres en aranés.