Èxit d’assisténcia ena charrada organizada peth Centre de Lauegi d’Aran

 

centre de lauegi- charrada ETEVA 25.01.17

Ager, 25 de gèr, era sala d’actes dera Escòla de Tecnics Esportius dera Val d’Aran (ETEVA) en Salardú, acuelhec ua charrada collòqui titolada: “Deth povàs reciclat as capes fèbles persistentes” organizada peth Centre de Lauegi d’Aran. Er objectiu ère hèr ua analisi dera situacion de perilh de lauegi qu’aguesti dies i a ena Val d’Aran e en bona part des Pirenèus.

Dempús dera nheuada d’aguest mes de gèr, ua capa de nhèu sucre de baisha coesion a demorat enterrada e ei era origina de lauegi accidentaus que sortosament non an provocat damatges as afectadi.

 

centre de lauegi- charrada ETEVA1 25.01.17

 

Coma mos an acostumadi, assistiren ues 150 persones qu’aumpliren completaments era sala d’actes dera ETEVA.

Pendent era ora e mieja que durèc er acte se hec ua revision dera evolucion dera nhèu pendent era sason, ua descripcion des accidents enregistradi e ua projeccion de coma pòt evolucionar aguesta situacion de lauegi çò que rèste dera sason iuernau.

Tanben participèren actiuaments bèri protagonistes des lauegi accidentaus qu’expliquèren en prumèra persona era sua experiéncia.

Eth public ère format fonamentauments per montanhencs, guides de montanha e professors d’esquí d’Aran, mès tanben i auie fòrce representacion des comarques vesies, Alta Ribagorça e Pallars.

 

centre laeugi-conselhèr

 

Eth conselhèr de Territòri d’Aran, Jose A. Boya, dèc era benvenguda as assistents e barrèc er acte en tot arregraïr era bona acuelhuda dera iniciatiua e era intensa collaboracion que i a entre es usatgèrs e eth Centre de Lauegi que hè possible qu’Aran sigue cabecièr ena prediccion de lauegi enes Pirenèus.

 

 

 

 

 

Vielha, 26 de gèr de 2017

 

Conselh Generau d’Aran: Núria Sanjuan

Hònt e fotos: Centre de Lauegi d’Aran 

Comments are closed.