Deth 17 ath 21 de seteme aueren lòc es VIIIaus Jornades Micologiques dera Val d’Aran que, coma cada an, organitzèc eth Conselh Generau d’Aran damb era collaboracion dera Societat Catalana de Micologia. Pendent es 5 jornades, fòrça gent participèc enes desparières activitats premanides.

En aguest sens, s’organizèren gessudes de camp pendent 3 dies, entà gésser a arremassar misharnons pes montanhes damb expèrtes en aguest airau. Es desparières espécies de misharnons arremassades sigueren expausades ena Sala d’Exposicions de Vielha, entà qu’era gent podesse saber quini misharnons son boni e quini son tòxics entara salut des persones. Un totau de 120 espécies de misharnons sigueren expausades.

Coma nauetat, enguan auec lòc un cors d’introduccion ath mon des misharnons,  i aueren conferéncies e ua taula redona entà parlar sus era naua regulacion implantada enguan ena Val d’Aran sus era arremassada de misharnons. Eth sindic d’Aran, Carlos Barrera, que participèc ena taula redona, comentaue qu’“aguesta regulacion permet protegir aguesta activitat de toti aqueri que vòlen hèr-ne un emplec comerciau. Consideram qu’ei ua activitat pro arraitzada ena Val d’Aran, e sus tot, cau remercar qu’ei ua regulacion que non a cap tipe de volentat economica, pr’amor qu’es carnets que s’aufrissen son totauments gratuits”.

Ath delà, es alumnes de 4au e 5au cors dera Escòla Garona de Vielha, participèren en aguestes Jornades Micologiques, entà conéisher prigondaments eth mon des misharnons.