• Era conselhèra de Cultura dera Generalitat de Catalunya a liurat aguesta tarde eth Prèmi Robèrt Lafont a Frederic Vergés   coma reconeishent peth sòn prètzhèt ena defensa, projeccion e promocion der aranés

• Aguest maitin, era sindica d’Aran e era conselhèra de Cultura s’an amassat entà tractar sus es principaus rèptes que trauèssen era cultura e era lengua araneses

Era sindica d’Aran, Maria Vergés, a recebut aguest maitin ena sedença deth Conselh Generau d’Aran ara conselhèra de Cultura dera Generalitat de Catalunya, Natàlia Garriga.

Pendent era jornada, an mantengut ua amassada ena qu’a estat presents tanben eth secretari de Politica Lingüistica dera Generalitat, Xavier Vila, eth cap der airau de Foment dera Lengua Occitana e dera Lengua de Signes Catalana der executiu catalan, Xavier Moral, es tecnics de Politica Lingüistica deth Conselh Generau, Veronica Barés e Xavier Gutiérrez, era directora der Archiu Generau d’Aran, Mari Pau Gómez, era directora der hilat de Musèus dera Val d’Aran, Carla del Valle, e era tecnica d’Auviatge deth Conselh Generau d’Aran, Elisa Ros.

“Era cultura siguec eth prumèr traspàs competenciau qu’era Generalitat de Catalunya hèc ara maxima institucion aranesa e, enquiath moment, non a estat ne revisat ne actualizat, e aquerò a comportat qu’eth Conselh Generau d’Aran non pogue desvolopar politiques culturaus que son de besonh en nòste territòri, autant entath foment dera cultura pròpria coma tar impuls de programacions artistiques” a manifestat era sindica d’Aran, en tot híger que: “en çò que tanh ar aranés, era situacion actuau dera nòsta lengua reclame un cambi immediat e urgent ena relacion entre es era Generalitat de Catalunya e eth Conselh Generau d’Aran entà amiar a tèrme ua politica lingüistica coordinada e consensuada, que permete promocionar e normalizar er aranés”.

En aguesta amassada, es responsables de Lengua, Auviatge, Musèus e Archiu deth Conselh Generau d’Aran an expausat es principaus rèptes qu’an d’afrontar es sòns respectius departaments e es problematiques qu’an de besonh era collaboracion deth departament de Cultura entà trapar solucions adientes que permeten promocionar e suenhar era cultura e lengua araneses.

En aguest sens, Vergés a rebrembat que “entath govèrn d’Aran aguest ei un ahèr capitau, pr’amor qu’era lengua e era cultura son eth motiu d’èster dera maxima institucion aranesa e er èish principau dera nòsta identitat”.

Era sindica d’Aran a volut arregraïr ara conselhèra Garriga “era sua predisposicion e volentat de trabalhar conjuntament damb eth Conselh Generau d’Aran entà promòir era nòsta lengua e cultura pròpries en tot encetar ua relacion basada ena collaboracion, eth consens e era leiautat institucionau” atau madeish era sindica a declarat que ” auem acordat crear ua comission de trabalh entre andús govèrns entà estudiar era actualizacion deth traspàs en matèria de cultura” e higie que “tanben vam a trabalhar conjuntament en un plan foncionau que servisque tâ projectar un centre culturau ena Val d’Aran, qu’actuaument ei er unic territòri deth Pirenèu sense un equipament d’aguest tipe a on se poguen realizar activitats culturaus”

Aguesta madeisha tarde, era sindica d’Aran e era conselhèra de Cultura, an presidit er acte de liurament deth 6au Prèmi Robèrt Lafont qu’era Generalitat a autrejat a Frederic Vergés coma reconeishent peth sòn prètzhèt ena defensa, projeccion e promocion der aranés.