Futur bastiment d’un nau centre de recuelhuda de residus dera Val d’Aran en Vielha e Mijaran

Eth Govèrn d’Aran a aprovat eth bastiment d’un nau centre de recuelhuda de residus en Vielha e Mijaran, en madeish lòc der actuaument existent, que se vedec afectat pes inundacions der an 2013 ena Val d’Aran.

Eth conselhèr de Territòri José Antonio Boya, a explicat que “eth nau centre de recuelhuda de residus serà de facil accès e damb era capacitat de besonh entà satisfèr era demanda des usatgèrs. Serà donques ahigec, un espaci dedicat ara recuelhuda ordenada e classificada des residus urbans: ordinaris, voluminosi, verdi o especiaus e ath madeish còp servirà a dar gessuda as residus que non an un circuit de reciclatge especific ara posita des ciutadans”.

2013 06 25 deishalheria vielha (6)
Era accion compde damb eth finançament de 250.000 € per part dera Agéncia de Residus dera Generalitat de Catalonha.
Eth nau centre de recuelhuda se plaçarà en madeish lòc der existent, donques qu’ei pròplèu ath nucli mès important de poblacion dera Val d’Aran.
Era installacion disposarà d’un espaci pasimentat a on aurà ua plataforma a ua nautor superiora damb passarèles de descarga, entà facilitar er accès des usatgèrs as contienedors e tanben disposarà d’un espaci corbit entath emmagazinatge des residus especiaus.

Eth Govèrn d’Aran, s’a prepausat eth bastiment d’aguest nau equipament, aguestes òbres son previstes que se realizaràn pendent eth 2016, non solaments pera afectacion des aiguats der an 2013, se non per que era actuau deishalleria ja ère obsoleta, ath delà de non trobar-se normalizat as requeréncies legaus actuaus, donques que dispòse de contienedors sense era capacitat de recuelhuda, classament e gestion avienta entà residus coma es provenenti dera poda, texil, ferralha e d’electrodomestics recuperables o especiaus.
Era naua installacion serà adaptada as naues nòrmes europèes de reciclatge coma eth RD 110/2015 sus Residus d’Aparelhs Electrics e Electrònics (RAEE) qu’adapte era nòrma sus era matèria dera UE 2012/19 / UE e era 22 / 2011 ena lei de Residus e solèrs contaminadi.

 

Un centre de recuelhuda adaptada as naui tempsi e as besonhs des usatgèrs.


Segontes José Antonio Boya, “era operativitat d’aguest servici consistís en qu’a era arribada d’un usatgèr, sigue particular o un comèrç, burèu, talhèr o petita industria o servici, un manòbra serà er encargat d’identificar era tipologia des residus e dera quantitat. Un còp identificat era carga, serà eth pròpri usatgèr acompanhat s’ei de besonh deth madeish manòbra, qui depausarà es residus en foncion dera sua tipologia enes desparièrs contienedors destinadi a cadua des classes de residus admetudi ena planta, o ath cobèrt especific entà residus especiaus”.

 

Residus que se gestionaràn.

Era naua recuelhuda contierà ua zòna corbida de residus especiaus, coma son residus toxics e perilhosi entara salut des persones e eth miei, atau coma fluorescents e ampola de baish consum, piles, aerosòls, bateries, òlis de coche, anticongelants, refregidors e aparelhs damb CFC, pentures, vernís e dissolvents, insecticides e plaguicides domestics, envasi de productes toxics, productes de cosmetica coma laca e acetona, radiografies, pneumatics, tòners de fotocopiadores e estampaires.

Residus recuperables. Aqueri residus que se pòden reciclar entà èster utilizadi facilaments coma matèries prumères encara que quauqui uns son potenciauments perjudiciaus entath miei coma es òlis de codina, ròba e cauçat, veire transparent, veire de color, botelhes de cava, tarcums, cables electrics.

Era zòna de contienedors en passarèles de descarga compdarà damb contienedors especifics entà reciclatge de materiaus procedenti de recuelhuda selectiva de husta, de veire, de texili, de farralha, de plastics e de residus voluminosi coma husta o mòbles.
Fin finala ei previst dotar es installacions der equipament entà que facilite er escambi entara reutilizacion per part des pròpris usatgèrs cossent damb era filosofia des directives europèes. Aguestes accions an estat promoigudes pera ARC (Agéncia de Residus de Catalonha), pendent er an 2015 damb ua naua linha de subvencions entara prevencion e era reutilizacion, qu’eth Conselh Generau d’Aran se li acuelhec ada eth e que n’a resultat era concession d’ua subvencion per impòrt de 48.400€.

2013 06 25 deishalheria vielha (2)

Comments are closed.