Edurne Pasaban coma Lydia e Maria Iglesias participaràn ena 6au Corsa dera Hemna eth pròplèu dimenge
Vielha, 5 de març de 2019.- Eth pròplèu dimenge 10 de març se celèbre era 6au edicion dera Corsa dera Hemna Val d’Aran qu’enguan nombroses esportistes de prumèr nivèu li dan supòrt.
Es esportistes son es jogadores dera prumèra plantilha deth RCE Espanyol Femenin; era rider paralimpica medalha de bronze enes Jòcs Paralimpics Pyeongchang 2018, Astrid Fina; Sandra Gómez, pilòt de Trial e Enduro Campiona deth Mon de superenduro; era alpinista Edurne Pasaban, era prumèra hemna ena istòria en ascendir es 14 ueitmils; e es esquiaires d’esquí de hons araneses Marta Cester, Campiona d’Espanha d’esquí de hons skating e María e Lydia Iglesias. Ath delà, tant Edurne Pasaban coma Lydia e Maria Iglesias participaràn ena 6au Corsa dera Hemna eth pròplèu dimenge.
Totes eres an grauat vidèos qu’animen a toti a dar supòrt as actes commemoratius deth Dia Internacionau des Hemnes e a participar ena 6au Corsa dera Hemna Val d’Aran deth dimenge 10 de març.
Era Còrsa dera Hemna ei organizada peth Servici d’Informacion e Atencion as Hemnes (SIAH) deth Conselh Generau d’Aran en collaboracion damb eth Conselh Esportiu dera Val d’Aran e era Associacion Volentaris Val d’Aran laguens es actes organizadi a l’escasença deth Dia Internacionau des Hemnes.
Ena 6ª Corsa dera Hemna, qu’ei daurida ara participacion de toti, se daràn tres prèmis entàs següentes categories: Absolutes hemnes; juvenil; Senior; Mastèr 30; Mastèr 40; Mastèr 50; Absoluts òmes.
Es inscripcions online ja se pòden formalizar en: https://inscripcions.cat/corsaderahemna2019/
Es inscripcions tanben se poderàn realizar de manèra presenciau eth diuendres 8 e dissabte 9 de març pera tarde de 17 a 20 ores ena sedença deth Conselh Generau d’Aran a on se poderàn apletar es dorsaus e era samarreta dera Corsa.
Eth prètz dera inscripcion ei de 3 €.
Era gessuda e era arribada dera Corsa se harà ena plaça deth Conselh Generau d’Aran. Er orari de gessuda dera 6au Corsa dera Hemna serà as 11 ores deth dia 10 de març de 2019.
Vos animam a participar!