Era Val d’Aran a entrat a formar part deth territòri LEADER laguens deth marc deth Programa de Desvolopament Rurau (PDR) de Catalonha 2014-2020. Eth programa Leader son ajudes europèes damb er objectiu de fomentar eth desvolopament locau des zònes ruraus, ajuts destinats majoritariament a empresaris e emprenedors deth territòri.
Era Val d’Aran s’a aderit ath Grop d’Accion Locau Consòrci Leader Pirenèu Occidentau qu’ei er organ gestor des ajudes Leader en Pallars Jussà, Pallars Sobirà, Alta Ribagorça e des d’enguan tanben en Aran.
Era metodologia Leader ei ua metodologia ascendent, a on es decisions se prenen des de cada territòri. Ara madeish se trabalhe ena naua Estrategia de Desvolopament Locau (EDL) e eth corresponent procès participatiu que mercarà es èishi principaus enes qué se basarà era pròpria estrategia deth Grop Leader entàs pròplèus 6 ans.
Per aguest motiu, era sedença deth Conselh Generau d’Aran a acuelhut era jornada participatiua destinada as joeni e as hemnes, es sectors des zònes ruraus de mès interès segons era Union Europèa.
Era Jornada a compdat damb era preséncia deth sindic d’Aran en foncions, Carlos Barrera, deth conselhèr en foncions d’Agricultura, Ramaderia e Medi Naturau d’Aran, Jose E. Arró, e dera conselhèra en foncions de Torisme, Comèrç e Consum d’Aran, Anna Díaz.
Barrera a manifestat “damb aguesta jornada volem dar a conéisher es ajuts LEADER que s’apliquen en estratégies de desvolopament rurau, e mès concretaments ena creacion e desvolopament de microempreses, foment d’activitats toristiques e conservacion e melhora deth patrimòni rurau”.
Entà toti aqueri que non auetz pogut vier, mès voletz dar era vòsta opinion, vos convidam a participar en dessenh des Estrategies de Desvolopament Locau (2014-2020) en tot ramplir era enquèsta que trobaratz en link de dejós.
Sonque vos supausarà 10 minuts, e collaboraratz ena melhora dera gestion e distribucion des ajudes Leader entàs pròplèus 6 ans.
Es responses dera enquèsta se tieràn en compde ara ora de definir es critèris d’avaloracion e priorizacion d´aguestes ajudes en nòsti territòri.
DATA LIMIT: 10 JUNH