Liberadi 75 exemplars de cabilat en arriu Garona

Vielha, 22 de deseme de 2017.- Ua trentia d’alumnes dera Escòla ZER de Ruda an participat ena liberacion de 75 exemplars de cabilat en arriu Garona.

Aguesta ei ua des accions de melhora des poblacions d’aguest peish, previstes en marc deth projècte LIFE+ LimnoPirineus, un projècte LIFE+ Natura coordinada peth Centre d’Estudis Auançadi de Blanes deth CSIC e qu’ei destinat ara melhora der estat de conservacion d’espècies e abitats aquatics dera nauta montanha des Pirenèus.

Es 75 exemplars an estat liberadi en un tram der arriu Garona, ena zòna d’accion deth projècte LIFE LimnoPirineus, entà refortilhar es poblacions romanents.

Eth cabilat o “cullereta” (Cottus hispaniolensis) ei un petit peish qu’aucupe arrius e torrents de nauta montanha, a on conviu damb era trueita comuna (Salmo trutta). Ei ua espècia endèmica dera vessanta nòrd des Pirenèus e, mès en concrèt, dera conca dera Garona, en tot includir era Val d’Aran, a on actuauments se trape extrèmaments menaçada a causa deth baish numerò d’individus e ar isolament respècte ara rèsta de poblacions dera conca. Sonque ei present en uns pòqui trams, damb densitats fòrça baishes.

Entà poder amiar a tèrme es liberacions d’aguest pèish s’an criat exemplars en captivitat a compdar de parentaus provenenti dera Val d’Aran. Aguest prètzhèt a estat encomanada a ADEFFA e s’a amiat a tèrme en Camadoca, centre de cria de fauna sauvatja e educacion ambientau. Damb eri, se demore refortilhar es poblacions romanents.

Eth projècte LIFE+ LimnoPirineus, coordinat peth Centre d’Estudis Auançadi de Blanes (CEAB) deth Consejo Superior de Investigaciones Científicas (CSIC), ei destinat ara recuperacion d’abitats e espècies aquatiques de nauta montanha des Pirenèus.

Coma sòcis i participen era Universitat de Barcelona, eth Conselh Generau d’Aran, eth Departament de Territòri e Sostenibilitat dera Generalitat de Catalonha, e es empreses Forestal Catalana e Sorelló Estudis en Miei Aquatic. Era Deputacion de Lhèida actue coma cofinançador.

Se realize entre 2014 e 2019, e preve ua inversion de 2,6 milions d’èuros, que 55% (1,4 milions d’èuros) ne seràn aportadi pera Union Europèa.

LIFE+LimnoPirineus perseguís melhorar er estat de conservacion d’abitats coma es “molleres”, es hònts carbonatades e es arrius e estanhs de nauta montanha. Entre es espècies objectiu a protegir i a bèri amfibis coma era gargolha ròia, eth tòtil e eth tritó pirenenc, era planta aquatica Luronium natans e eth cabilat (Cottus hispaniolensis).

Comments are closed.