Liurament deth Prèmi Robèrt Lafont ara Fundacion deth Musèu Etnologic dera Val d’Aran

Vielha, 6 de mai de 2017.- Delànet ena glèisa de Sant Miqueu de Vielha, eth Conselh Generau d’Aran e era Generalitat de Catalonha, autregèren eth 4au Prèmi Robèrt Lafont ara Fondacion Privada deth Musèu Etnologic dera Val d’Aran. Er acte compdèc damb era preséncia deth vicesindic d’Aran, Luís Carlos Medina e era directora generau de Politica Lingüistica dera Generalitat, Esther Franquesa.

IMG_9444

Eth Prèmi Robèrt Lafont a coma objectiu arreconéisher e premiar persones o entitats que s’agen distinguit pera defensa, projeccion e promocion dera lengua e dera cultura occitana damb eth sòn trabalh e investigacion.

Ei eth prumèr còp qu’eth Prèmi Robèrt Lafont què en ua entitat, anterioraments auien arrecebut aguest guerdon, Pèire Bèc (2010), Felip Gardy (2012) e Jacme Taupiac (2014).

Pendent era sua intervencion, eth vicesindic d’Aran, Luís Carlos Medina, destaquèc eth trabalh hèt pera Fondacion deth Musèu Etnologic dera Val d’Aran ath long deth temps e era sua implicacion ena defensa des valors dera lengua e era cultura aranesa coma auviatge de toti es aranesi, tau e coma hec tanben Esther Franquesa, en tot destacar era implicacion dera Generalitat de Catalonha en supòrt e ena defensa dera lengua occitana.

Era Fondacion Privada deth Musèu Etnologic dera Val d’Aran siguec creada er an 1973, entre es sues activitats cau destacar er impuls er an 1976 des prumèrs concorsi literaris en aranés, era publicacion dempús der an 1977 dera revista Tèrra aranesa, damb er objectiu de deféner er aranés e era organizacion annau de la Corsa d’Aran per sa lengua, entre d’autes activitats.

En acte de liurament deth Prèmi Robèrt Lafont, era actuau presidenta dera entitat, Rosa María Salgueiro, volec arregraïr a totes es persones qu’an collaborat damb era Fondacion, atau coma era reconeishença explicita ath trabalh desvolopat pes anteriors presidents e presidentes dera Fondacion deth Musèu Etnologic dera Val d’Aran ara ora d’arrecéber aguesta distincion.

Eth president der Institut d’Estudis Aranesi- Academia aranesa dera lengua occitana, Jusèp Loís Sans, destaquèc qu’en aguesta escadença se premiaue era volontat populara d’arreconéisher eth valor der auviatge dera Val d’Aran e era volontat institucionau e politica d’arrespóner ara sensibilitat sociau dera Fondacion que siguec creada entà promòir e hèr difusion des valors der extraordinari auviatge aranés, donques ath premiar ara Fondacion deth Musèu Etnologic dera Val d’Aran, se premie era constància deth pòble aranés, era vinculacion voluda damb era sua istòria e eth sentiment de defensa dera sua identitat.

Er acte d’autrege deth 4art Prèmi Robèrt Lafont acabèc damb era interpretacion der imne dera Val d’Aran, “Montanhes Araneses”, a cargue dera cantautora aranesa Alidé Sans.

Comments are closed.