Lucas Eguibar guanhe era classificatòria dera Copa deth Mon de snowboard cross FIS en Baqueira Beret

Vielha, 1 de març de 2019.- Lucas Eguibar rider dera Reau Federacion Espanhòla Espòrts d’Iuèrn (RFEDI), a possibilitats d’entrar en pòdium dera Copa deth Mon de Baqueira Beret, donques qu’ena pròva deth diuendres a enregistrat eth melhor temps, damb (53,44). En dusau lòc s’a hicat ena finau deth dissabte er austriac Alessandro Haemmerle (53,63), seguit der italian Lorenzo Sommariva (53,89). Eth medallista olimpic espanhòu dera RFEDI Regino Hernández s’a classificat en ueitau posicion damb un temps de 54,39. Dempús de finalizar era baishada guanhadora, Eguibar s’a mostrat fòrça satisfèt damb eth resultat.

Era chèca Eva Samkova a estat era rider mès rapida deth diuendres, damb un crono de (56,60). Era dusau classificada a estat era italiana Francesca Gallina damb un temps de (56,80) e tresau a resultat era nòrd-americana Lindsey Jacobellis (56,81), rider qu’a dia d’aué aucupe eth prumèr lòc dera generau.

Damb ues condicions meteorologiques fòrça bones, eth diuendres 1 de març, era estacion de Baqueira Beret a estat eth scenari des pròves dera Copa deth Mon de snowboard cross, eveniment patrocinat per Movistar e Seguros Catalana Occidente. 91 esportistes (56 òmes e 35 hemnes), es melhors deth mon, an dat çò de melhor d’eri madeishi entà entrar ena finau, que se disputarà eth dissabte 2 de març. Es pròves femenines s’an iniciat as 11.15 ores e es masculines entàs 13.15 ores.

Ena finau deth dissabte concorreràn 16 hemnes e 32 òmes. En cas des hemnes es 8 prumères an classificat dirèctaments ara finau e en cas des òmes an estat es 16 prumèrs. Eth rèste de classificadi entà concretar es quadres s’a decidit en ua espectaculara dusau manja de tot o bric.

Eth dissabte 2 de març a meddia, concorreràn es 32 riders dera categoria masculina e es 16 corredores dera categoria femenina, classificadi eth diuendres. Es riders disputaràn era sua prumèra ronda en ueitaus de finau. Es corredors baisharàn en grops de 4 e es dus prumèrs de cada manja passaràn ara següenta eliminatòria (ueitaus de finau, quataus de finau, semifinaus e finaus) enquia arribar ara grana finau (big final) e era finau de consolacion (small final) entà decidir es lòcs deth 1èr ath 8au.

En totau, 91 snowboarders s’an desplaçat en Baqueira Beret (56 òmes e 35 hemnes) procedenti de 17 païsi: Alemanha (7), Andòrra (1), Argentina (1), Australia (6), Àustria (9), Canadà (9), Espanha (2), Estats Units (16), França (9), Finlàndia (1), Itàlia (11), Japon (2), Païsi Baishi (1), Polònia (1), Gran Bretanha (2 ), Republica Chèca (4) e Soïssa (9).

Era Copa deth Mon SBX ena Val d’Aran compde damb eth supòrt d’institucions esportiues coma eth Conselh Catalan der Espòrt (CCE), amassa damb era RFEDI (Reau Federacion Espanhòla d’Espòrts d’Iuèrn) e era collaboracion des institucions locaus coma eth Conselh Generau d’Aran, er ajuntament de Naut Aran e era Deputacion de Lhèida. Tanben cau arrebrembar era vinculacion des clubs aranesi d’esquí e dera Associacion Volentaris d’Aran.

Programa dera finau dera Copa deth Mon SBX

Dissabte 2 de març:

12:15-13:00 ores: Entrenament.

13:30-14:50 ores: Finaus SBX (ueitaus, quataus, semifinaus e finau).

15:00-18:00 ores: Hèsta damb DJ Serx Einheri en village.

Info: Baqueira Media

Fotos: Fototur

Comments are closed.