Morís un esquiaire estonat per un laueg en dehòra pista dera Vinyeta

Vielha, 26 de gèr de 2019.- Un laueg a provocat era mòrt d’ua persona aguest maitin ena zòna dera Vinyeta pròplèu ara estacion de Baqueira Beret.

Er accident arribèc entàs 11.30 ores deth maitin ena cara nòrd dera zòna de dehòra pista coneishuda coma era Vinyeta. Enes prètzhèts de rescat an participat equipes deth GRM (Grop de Rescat de Montanha) des Pompièrs d’Aran, era unitat de montanha des Mossos d’Esquadra e pisters de baqueira.

En prumèr moment er esquiaire a estat rescatat e a estat evacuat en elicoptèr en Espitau dera Val d’Aran en Vielha herit grèu. Pòc dempús a mòrt.

Er esquiaire ère un joen de 31 ans monitor d’ua coneishuda escòla d’esquí e damb ua grana experiéncia.

Cau arrebrembar qu’eth Centre de Prediccion de Lauegi deth Conselh Generau d’Aran manten un nivèu mercat 3 sus 5 de perilh de lauegi, damb capes fèbles persistentes e nhèu umida, per çò que se recomane extremar es precaucions enes activitats de montanha.

Comments are closed.