Un totau de 23 establiments aranesi expausen es sòns productes ena hèira
Se realizaràn diferenti talhèrs e se realizarà ua tòia d’un lòt de productes
Era conselhèra de Torisme, Comèrç e Consum, Anna Díaz, e eth còsso der Ajuntament de Vielha e Mijaran, Carlos Nart, ena inauguracion aué d’Aran Market.
Eth Conselh Generau d’Aran a organizat ua naua edicion dera hèira Aran Market, qu’aurà lòc en Vielha a compdar d’aué diuendres, dia 22 ath 24 d’agost. Era hèira preten promòir es diferenti productes des comerçants dera Val d’Aran.
Un totau de 23 establiments an tret en carrèr es sòns productes entà hèr conéisher era vasta varietat qu’aufrís eth comèrç aranés. En aguest sens, i an comerçants de ròba, alimentacion, souvenirs, complements, decoracion, atau coma era preséncia de diuèrsi mestieraus.
“Aran Market ei un eveniment que pòrte ja diuèrsi ans en marcha, e que cada an artenh atrèir era atencion de fòrça visitants. Atau, se poténcie eth comèrç aranés, damb era preséncia de visitants ath long des diferentes jornades que dure era hèira”, a comentat aué pendent era inauguracion d’Aran Market, era conselhèra de Torisme, Comèrç e Consum d’Aran, Anna Díaz.
Pendent es tres dies dera hèira i aurà un totau de 30 estands a on se veneràn es productes. Ath delà, tanben se realizaràn diferenti talhèrs d’artesania e de texil amiadi a tèrme pes madeishi comerçants.
En finalizar era hèira se realizarà era tòia d’ua cistalha complèta damb diferenti productes des estands participants. Er orari d’Aran Market serà d’11h00 a 21h00 ininterrompudament.
TALHÈRS D’ARAN MARKET
Dissabte 23 d’agost:
• 11h30 a 13h00:
Talhèr de punt entà a adults a cargue de Talhèr textil de Bausen
• 17h30 a 19h00:
Guarnís eth tòn pròpi clauèr a cargue de Baobab artesanía
Talhèr de costura a cargue de Tricobebé
Dimenge 24 d’agost:
• 11h30 a 13h00:
Talhèr damb materiau reciclat a cargue de Dwayna artesania
• 17h30 a 19h00:
Talhèr de pastissaria a cargue de La Guinda
Talhèr damb hanga polimerica a cargue d’Alícia Mitjans