Eth hestau aurà lòc eth 4 e 5 d’agost e compdarà damb 16 proposicions gratuïtes de musica e dança, entre d’autes disciplines, en Montgarri, Salardú e Baquèira
Pendent dus dies, es hemnes creadores prenen tot eth protagonisme en Pirenèu
Hemnes, Hestau de hemnes creadores en Pirenèu, presente era programacion dera sua tresau edicion, qu’aurà lòc eth 4 e 5 d’agost en tres espacis dera Val d’Aran: Montgarri, Salardú e Baquèira. Pendent dus dies, s’amiaràn a tèrme 16 proposicions gratuïtes ar aire liure de musica, dança e d’autes disciplines artistiques, damb nòms com Núria Graham, Clara Peya, Esther Condal, The Crab Apples, Brigitte Laverne e Las Monacas, entre d’autes.
Coïncidint damb era Hèsta Major de Baquèira, Hemnes Hestau propòse un hestau eminentment femenin, damb proposicions entà toti es publics en scenaris ar aire liure e idillics dera Val d’Aran. Entre es espacis qu’acuelheràn es proposicions cau remercar eth Santuari de Montgarri, era plaça Fòrum de Baquèira e era plaça dera glèisa romanica de Salardú (que date des sègles XII e XIII). Un eveniment que confie en portar tath Pirenèu artistes joenes que regessen en sòn encastre, proposicions emergentes, dialògs entre musica e dança d’artistes contemporanèes e, tanben, per devier referent ena creacion de naui espacis scenografics ena madeisha natura. Musica (passant pera cançon d’autor, eth jazz, era electronica o eth pòp), dança, teatre o charrades sus salut e natura, son quauqu’ues des activitats qu’a programat eth hestau, qu’enguan hè un pas mès entà daurir-se a naui publics e consolidar-se com un eveniment de referéncia en Pirenèu aranés.
Clara Peya
Tanhent ara programacion, eth hestau començarà dijaus 4 d’agost, damb ua petita caminada a cargue dera biològa e divulgadora Sara Arjó que mostrarà era grana riquesa patrimoniau e naturau dera Val d’Aran ena activitat Es plantes de montanha. Guardar, tocar, shomar e escotar legendes e istòries des aranesi seràn quauqu’ues des proposicions d’aguesta activitat que se harà en Montgarri (10:30 h). A continuacion, en madeish espaci (12 h), arribaràn des de Barcelona Les Impuxibles. Beuent de hònts diuèrses (dança, musica, teatre, performance…), era pianista Clara Peya e era sua germana coreografa Ariadna presentaràn Luzula, ua pèça de dança e musica de grana expressivitat e beresa.
Ena tarde, eth hestau continuarà ena plaça dera glèisa de Salardú, damb era doctora e osteopata Carme Mombiedro, qu’auferirà era charrada Escotem eth nòste còs. Eth rèpte dera medicina, damb qui es assistents poderàn apréner mecanismes entà gestionar es emocions prigondes (17 h, sala annèxa polivalenta). Ua ora mès tard, des de Pau (França) arribarà era formacion Las Monacas, dedicada as cants polifonics gascons. Dera man d’Audrey, Lucia e Sonia se poderàn conéisher es cançons que s’an cantat e que se canten encara enes tavèrnes dera region de Bearn (18 h).
Seguidament, Carmela Rodríguez e Carmen Bonifaci, dues des dessenhadores e mèstres artesanes que trabalhen actuaument en territòri e que se dediquen a possar era revalorizacion dera lan aranesa, oferiràn ua desfilada damb es sues creacions (19:15 h). Dempús, serà eth torn dera barcelonesa Clara Peya. Pianista e compositora d’ua expressivitat sense limits, ei capabla de convertir un concèrt de piano en una autentica performance. Eth sòn darrèr trabalh se ditz Mimulus (Temps Record, 2015), que presentarà damb era collaboracion dera dançaira Ariadna Peya (19:30 h). Tanben des de Barcelona arribarà Esther Condal, considerada ua des granes votz deth jazz catalan. Presentarà es cançons deth sòn darrèr disc Bird (22:30 h). Barrarà era net e era prumèra jornada deth hestau era artista multidisciplinària Bel, que mècle estils com eth pòp andalós, eth swing, eth flamenc e era percussion corporau. Despús deth sòn pas pera companhia Mayumana, presente eth disc Pasatos de Jijala (Mapa Musical, 2014), un aumenatge as sues prumères sabates de gitana, enregistrat en estudi privat de Joaquín Sabina (00 h).
Núria Graham
Diuendres 5 d’agost, començarà en Baquèira damb eth talhèr de Mudes dera dançaira e terapèuta Anna Rubio, especialista en dança ena natura. Ua proposicion entà apréner a escotar, e a construïr ua accion en moviment o dançada damb acompanhament musicau (10 h). Ena tarde, era antropològa Nora Muntañola presentarà Veus de hemnes: testimònis que bastissen naui camins, ua charrada entà recórrer naues vies sus cooperacion e exili (17 h, Hotel Montarto). Seguidament, arribarà era cantautora e pianista sabadelhenca Lu Rois, que des de que debutèc damb Camí del Far (autoeditat, 2015), ja s’a hèt un nòm ena scèna musicau deth país. Presentarà eth sòn nau trabalh, Cau de Lluna (autoeditat, 2016), un conjunt de cançons plees de fòrça, vitalitat e coratge, sense deishar de costat era sua doçor e sensibilitat (18 h). Durant eth concèrt de Lu Rois, era dançaira e improvisadora francesa Claudia Flammin crearà dances ath moment a partir d’elements deth sòn entorn immediat (paisatge, musica, sensacions…). Ua metuda en scèna que harà de cada segon, unic e diferent, sense directritzes preestablides (18 h). A continuacion, seràn eth torn d’espectacle de “cabaret pagès” L’Esperanceta per un dia, damb eth quau es assistents coneisheràn ua hemna de grotèsca delicadesa que vos enamorarà damb es sues viuences (19:15 h).
Mès tard, eth protagonisme serà tara vigatana Núria Graham, que des que presentèc era sua prumèra grabacion, a confirmat un talent doriu e singular entà composar e cantar pòp-ròck de perfil classic. Ara presente es cançons deth sòn darrèr disc, Bird Eyes (El Segell del Primavera, 2015) en qué era sua votz velhutada se hique en mapes sonics modèrns, inesperats, qu’entoren es cançons damb rotunditat (19:30 h). Eth hestau continuarà damb era proposicion de The Crab Apples, que despús de passar per concorsi com eth Sona 9, d’obtier sies nominacions as prèmis Enderrock de votacio populara, e de presentar eth sòn disc de debut, Right here (Discmedi, 2015), arribe damb er EP e fanzine Hello Stranger (Discmedi, 2016). Ua colleccion de cançons a miei camin entre eth ròck e era musica mès atmosferica, damb bases contundentes e melodies pòp ath servici d’ues letres critiques damb era societat actuau (22:30 h). Barrarà era net e eth hestau Brigitte Laverne, ua artista barcelonesa que s’a situat com ua des naues promeses dera musica electronica damb eth synthpop alternatiu coma carta de presentacion. Damb sonque un EP publicat, Brigitte Laverne (Foehn Records, 2015), a principis d’an formèren part deth Sónar de Reykjavík e hè dus ans siguec era soleta artista der Estat espanhòl escuelhuda entà participar ena Red Bull Music Academy en Tòquio (00 h).
Hemnes Hestau, organizat per Gatalheues de Lum e damb eth supòrt der Ajuntament de Naut Aran, eth Conselh Generau d’Aran e Val d’Aran, Era esséncia des Pirinèus, neishec hè tres ans damb er objectiu de mostrar proposicions femenines en petit format e èster un eveniment artistic de referéncia en Pirenèu aranés. Peth hestau ja i an passat artistes catalanes e occitanes com Meritxell Gené, Yaíma Orozco, Carola Ortiz, e Marilis Orionaa, entre d’autes.
Mès informacion:
Alda Rodríguez | Alter Sinergies
Dossier de premsa Hemnes Festival
www.hemnesfestival.com | comunicacio@altersinergies.com
Vielha, 1 d’agost de 2016
Conselh Generau d’Aran: Núria Sanjuan