Vielha, 30 de gèr de 2019.- Era jornada de formacion e practica l’a realizat eth GRM (Grop de Rescat de Montanha) des Pompièrs d’Aran amassa damb era Associacion de Guides de Montanha dera Val d’Aran.

Era formacion a consistit en ua jornada practica de progression e escalada en gèu.

Eth GRM d’Aran ei era unitat especializada en rescats de montanha e accions en lauegi deth Servici Integrau d’Emergéncies dera Val d’Aran.

Aguesta formacion s’ahig ara realizada est an passat en Baqueira Beret sus era coordinacion des diuèrsi grops qu’actuen en un scenari de multiples victimes en cas de lauegi, dera transferéncia d’informacion e des diuèrses fases deth rescat a on participèren es unitats deth madeish GRM, deth Centre de Prediccion de Lauegi deth Conselh Generau d’Aran, pisters de Baqueira Beret, Agents de Mossos d’Esquadra, Agents de Miei Ambient, Agents Forestaus, Guides de Montanha, Agents dera Gendarmerie francesa , de CRS de Luchon, e dera Guardia Civil.

Eth GRM des Pompièrs d’Aran s’aucupèc era darrèra dimenjada des prètzhèts de rescat d’un joen esquiaire que siguec estonat per un laueg en dehòra pista dera zòna dera Vinyeta pròplèu ara estacion de Baqueira Beret.