• Era conselhèra de Coneishement deth Conselh Generau d’Aran, Angelina Cases, presidie aguest passat diuendres era presentacion deth 9au Plan de Dinamica Educativa dera Val d’Aran.

Tar acte i assistiren representants e docents des centres educatius d’Aran entà conéisher de prumèra man es activitats qu’aufrissen es Servicis Educatius dera Val d’Aran e dera Alta Ribagorça, eth Conselh Generau, Bibliotèques, Mossos d’Esquadra, associacions e enterpreses dera comunitat educativa aranesa.

Entre es prepauses mès remercables i son aguestes:

-Promòir er usatge der aranés.

-Ajudar a conéisher milhor era realitat istorica, culturau, naturau e sociau d’Aran.

-Activitats motivadores entar alumnat.

-Potenciar era implicacion des institucions locaus e dera comunautat educativa enes activitats informatives e culturaus organizades peth servici educatiu.

-Facilitar as centres eth dessenh d’activitats d’ensenhament-aprenedissatge promoiguent era relacion damb er entorn damb gessudes, visites e actuacions d’agents der entorn enes centres educatius.

-Implicar a tota era comunitat ena educacion der alumnat.

En calendari cau remercar es jornades e concorsi coma eth 2au recitau de poesia en aranés, era XX jornada Invest-jove o era setmana dera sciéncia enquia arribar a un totau de 29 activitats educatives.

Eth Servici Aranés de Benéster e Salut, a trauès des sòns servicis assistenciaus, prepause camps coma eth benèster emocionau, resolucion de conflictes e comunicacion, violéncies masclistes e LGTBIfobies e eth consum de substàncies e addiccions entre d’auti.

Era agenda contemple tanben, a trauès deth Departament de Territòri, Paisatge e Cambi Climatic, ua guardada a projèctes coma Bòscaran, accions des d’Agents de Mèdi Ambient en actuacions de sauvament de peishi, introduccion ath mon dera apicultura e er abitat der os ròi en Pirenèu.

Tanben mos prepause talhèrs de productors Mèrca de Garantia o charrades de Pompièrs Emergéncies d’Aran a torn dera seguretat ena montanha en iuèrn e en estiu.

Eth Hilat de Musèus dera Val d’Aran adapte es contenguts e formats des activitats en foncion deth curriculum escolar e er airau de Cultura e Lengua prepause, ena agenda 2026-2027, corsi d’aranés, concorsi e prèmis e talhèrs d’escritura creativa.

Er archiu Generau met a disposicion der alumnat eth libret de produccion pròpria “Es capletres der Archiu” ath delà d’ua visita guidada ara casa deth Senhor d’Arròs, sedença institucionau deth Conselh Generau d’Aran, e taben era visita d’exposicions.

Charrades deth Centre de desvolopament en MONTANHA Hèpic en projèctes d’innovacion.

Celebracion des 25 ans dera Bibliotèca Generau de Vielha o club de Lectura Infantila ena Bibliotèca Municipau deth Naut Aran.

Es Mossos d’Esquadra participen en aguest Plan de Dinamica Educativa damb charrades formatives. Remercar tanben era participacion dera empresa Arantec qu’amassen tecnologia e climatologia e era empresa Baqueira Beret que i participe damb accions vinculades ara empreneduria enes empreses.

Laguens deth Plan, associacions coma ADDA, que trabalhe entà melhorar era qualitat de vida des persones damb discapacitat entà promòir era inclusion, daurirà es pòrtes des sues installacions coma espaci d’escambi, coneishença e aprenedissatge mutuau entre era comunitat educativa e es persones de ADDA.

Eth Plan de Dinamica educativa dera Val d’Aran se barre damb era associacion sense interès lucratiu creada recentament, “Aran pera Natura”, que propòse ua gimcana de tralhes entà qu’er alumat pogue apréner a reconéisher es tralhes mès caracteristiques dera nòsta fauna (peades, plumes, excrements….)

Vielha, 10 de seteme de 2026