- Eth Conselh Generau d’Aran collabòre damb eth Freeride World Tour, en tot èster era Val d’Aran er scenari deth prumèr eveniment d’aguesta competicion mondiau
Aguest maitin, era sindica d’Aran, Maria Vergés e eth conselhèr d’Espòrt e Governacion, Amador Marqués, an visitat era Diputació de Lleida en motiu der acte de presentacion deth Freeride World Tour (FWT) qu’enguan aurà lòc ena estacion aranesa Baqueira Beret.
Conjuntament damb eth president dera Diputació de Lleida, Joan Talarn e damb eth director de màrqueting de Baqueira Beret, Xavi Ubeira, era sindica d’Aran a compareishut dauant des mieis de comunicacion ena ròda de premsa, ena qu’a manifestat qu’ “aguest eveniment servirà tà posicionar ara Val d’Aran, e ara estacion Baqueira Beret, coma referents ena organizacion d’eveniments internacionaus demostrant qu’auem era capacitat entà hèr competicions d’aguest nivèu. Sustot, dauant deth rèpte qu’auem coma territòri damb era candidatura des jòcs olimpics d’iuèrn”, tanben a hijut, “voi arregraïr a Baqueira Beret per aguesta apòsta qu’implicarà un naut grad de preparacion e implicacion per part de tota era estacion, e ara Diputació de Lleida peth supòrt qu’a balhat ad aguest campionat”.
Per prumèr viatge, aguest internacionau campionat se celebrarà en Espanha, ena estacion aranesa de Baqueira Beret, qu’estrearà eth calendari FWT 2022, en tot acuélher eth prumèr event d’enguan es dies 22 e 23 de gèr, en tot que’an prevista era estancia en Aran enquiath 28 de gèr per s’es condicions climatologiques non son es mès adientes. Se preven, qu’aguesta competicion acuelherà en Aran a mès de 150 persones entre esquiaires, snowboarders, mieis de comunicacion, tecnics e membres dera organizacion.
En aguesta 15au. edicion deth Free Ride World Tour 2022, era competicion recorrerà cinc païsi:
Deth 22 ath 28 de gèr, en Baqueira Beret, Espanha
Deth 30 de gèr ath 5 de hereuèr, en Ordino Arcalís, Andorra
Deth 12 ath 17 de hereuèr, en Kicking Horse Golden BC, Canadà
Deth 15 ath 20 de març, en Saalbach Fieberbrunn, Austria
Deth 26 de març ath 3 d’abriu, en Verbier, Soïssa
Es mielhors freeriders deth món competiràn enes majestuoses montanhes dera Val d’Aran, 50 òmes e 30 hemnes, esportistes entre es quaus i é, er esquiador aranés, Aymar Navarro, qu’artenhèc er iuèrn passat era 3au. posicion en aguest campionat, en tot èster eth prumèr espanhòu en pujar ath pòdium dera gran finau d’aguest cirucuit mondiau de freeride. Mès non serà er únic aranés en participar, pr’amor qu’Abel Moga, tanben esquiador de freeride, a estat convocat tara edicion d’enguan. Autan coma, Àlex Dedieu qu’ac harà ena categoria d’esquí freeride junior, en tot estrear-se es dus en FWT enes montanhes que les an vist crèisher. Toti tres, formen part dera èlit deth freeride e representen un simbèu d’orgulh der espòrt aranés, tant peth sòn indiscutible talent e era sua admirabla valentia, coma pes professionaus que les an format coma esquiaires e eth supòrt des familhes tà poder practiar aguest espòrt.