Vielha, 7 de junhsèga de 2016.- Er operatiu dera 9au etapa deth Tour de França que gesserà de Vielha-Val d’Aran eth pròplèu dimenge as 12 ores, a estat presentat aguest maitin ena sedença deth Conselh Generau d’Aran.
Era presentacion des desparièrs dispositius a anat a cargue de Luís Carlos Medina, vicesindic d’Aran e conselhèr d’Espòrts; José Antonio Boya, conselhèr de Territòri; e Anna Díaz, conselhèra de Torisme e Desvolopament Economic deth Conselh Generau d’Aran.
Eth Tour de França ei era tresau competicion esportiua mès seguida en mon, dempús des Jòcs Olimpics d’ostiu e deth Mondiau de fotbòl, emetuda a mès de 170 païsi e damb un gran nombre de seguidors en dirècte.
Eth vicesindic d’Aran, Luís Carlos Medina, a avalorat fòrça positivaments er esfòrç que s’a hèt des deth Conselh Generau d’Aran, damb era implicacion de toti es sòns departaments e tanben era collaboracion des desparières institucions araneses entà hèr realitat aguest projècte, qu’a dit, coneisheram era sua repercussion enes pròplèus ans, coma arribèc en sòn moment damb eth finau d’etapa en Pla de Beret dera edicion deth Tour de 2006. “Sense 2006, aué non seríem ací en tot parlar dera etapa qu’acuelherà era Val d’Aran eth pròplèu dimenge”, didec.
En çò que tanh ar impacte toristic e economic, era conselhèra de Torisme, Anna Díaz, assegurèc qu’un des èxits d’organizar era etapa deth Tour ena Val d’Aran, ei poder ligar era mèrca toristica Val d’Aran ara deth Tour de França, damb çò que represente d’impacte en promocion. Díaz, a volut destacar que dempús der esquí, era activitat ciclista ei un producte estela entara Val d’Aran, en tot èster era activitat mès demandada dehòra dera sason d’iuèrn. Tanben i a gent que programe es sues vacances en foncion des etapes deth Tour de França, assegurèc.
En çò que tanh ara aucupacion otelèra, Diaz expliquèc qu’entà aguesta dimenjada era Val d’Aran pòt aufrir ues 12.000 places, entre otèls e campings, e que ja son totes aucupades. Enes comarques vesines tanpòc i a places liures entara dimenjada deth Tour ena Val d’Aran.
En çò que tanh ar operatiu logistic e de seguretat, José Antonio Boya, expliquèc qu’era organizacion dera etapa mobilizarà aguesta dimenjada 664 Mossos d’Esquadra, que trabalharàn de manèra coordinada damb es 70 Gendarmes qu’acompanhen era carrèra, ath delà des 50 vigilants de seguretat que trabalhen as ordes dera organizacion deth Tour de França. Boya, expliquèc qu’era organizacion e es equipes dera carrèra, ja mobilizen per eri madeishi, 1.200 veïculs e 2.500 persones.
Eth conselhèr de Territòri, a volut arregraïr eth trabalh realizat en collaboracion damb er Ajuntament de Naut Aran, er Ajuntament de Vielha e Mijaran, atau coma era dera Diputacion de Lhèida, Baqueira Beret, Agéncia Catalana de Torisme, e era Secretaria Generau der Espòrt dera Generalitat de Catalonha.
Entà José Antonio Boya, damb era etapa deth Tour deth dimenge, non solaments guanhe era Val d’Aran mès tot eth Pirenèu, e a volut destacar era participacion en operatiu des Volontaris d’Aran, sense era sua participacion tot aurie estat mès dificil de trèir entà deuant, didec.
Finalament, es tres responsables deth Conselh Generau d’Aran, an metut en valor, que “era organizacion d’un eveniment esportiu de prumèr orde mondiau coma ei eth Tour de França, ei ua grana veirina entà mostrar totes es capacitats dera Val d’Aran, tant en aspècte toristic e organizatiu, coma es capacitats a nivèu sanitari, d’emergéncies e empresariau”.