Prumèra amassada des grups de trabalh deth projècte ENTREPYR II

Vielha, 26 de gener de 2018.- Eth Conselh Generau d’Aran acuelhec eth passat dijaus era prumèra amassada des grops de trabalh deth projècte ENTREPYR II, que ei part deth Programa de Cooperacion Territoriau Europèa INTERREG V-A (Espanha-França-Andòrra) POCTEFA 2014-2020.

Eth projècte ENTREPYR ll, damb ua subvencion de 97.500 €, permeterà ath Conselh Generau d’Aran installar en dus refugis de montanha dera Val d’Aran dus banhs shuts e dues potabilizadores entath tractament d’aigües residuaus. A part d’aguestes melhores eth Conselh Generau tanben a previst destinar part d’aguesta subvencion ara melhora dera promocion e comercializacion des rotes de senderisme dera Val d’Aran, atau coma era difusion des madeishes via web.

En aguesta prumèra amassada en Conselh Generau d’Aran, se definiren es grops de trabalh e es prètzhèts que desvoloparàn; entre d’auti, era definicion de rotes e itineraris, era unificacion dera cartografia, es fiches des refugis de montanha que en seràn part, es circuits, atau coma era definicion dera pagina web, eth motor de resèrves e era creacion d’un plan de comunicacion. Ath delà, un des trabalhs que tanben s’amiaràn a tèrme ei er analisi des sistèmes de depuracion e tractament des aigües.

ENTREPYR II ei un projècte que recuelh coma un des sòns objectius principaus arténher qu’es amants dera montanha poguen recórrer indistintaments e amassa es refugis espanhòus, francesi e andorrans, e era utilizacion des naues tecnologies enes refugis deth Pirenèu.

Eth Conselh Generau d’Aran participe d’aguest projècte europèu amassa damb era Federación Aragonesa de Montañismo, era Federació d’Entitats Excursionistes de Catalunya (FEEC) e eth Gobierno de Aragón per part espanhòla, amassa damb eth Parc National des Pyrénées, l’Université de Toulouse III e era Federation Française des Clubs Alpins et de Montagne pera part francesa, e era Federació Andorrana de Muntanyisme coma entitat associada.

 

Era dusau amassada deth projècte ENTREPYR II serà eth pròplèu dia 1 de hereuèr en Andòrra.

 

 

Comments are closed.