Vielha, 28 d’agost de 2018.- Era plantilha e eth còs tecnic deth Kirolbet Baskonia an estat arrecebudi peth cap de gabinet deth Conselh Generau d’Aran, Pau Perdices, ena sedença deth govèrn d’Aran.

Eth Kirolbet Baskonia, actuau subcampion dera liga ACB, e participaire dera Euroliga de basquetbòl, ei concentrat ena Val d’Aran des deth passat dia 24 d’agost, a on realize un stage de preparacion entara pròplèu sason.

Er objectiu principau d’aguest stage ei era preparacion fisica, entàs pròplèus partits deth 5, 7 e 9 de seteme front eth Partizan de Belgrad, Cafès Breogán e Delteco GBC. Per d’auta part, eth stage se complète damb activitats ar aire liure e dinamiques de grop qu’ajuden as relacions entre era equipa e era integracion des naues incorporacions.

Pau Perdices, a arregraït ath Kirolbet Baskonia que realize eth sòn stage ena Val d’Aran, ath delà de desirar-li ara equipa fòrça sòrt en sòn objectiu ena Euroliga, poder arribar ara Final Four que se disputarà ena sua ciutat, Vitòria-Gasteiz, en mes de mai.