Era estacion aranesa de Baqueira Beret acuelherà es dies 4 e 5 de hereuèr era 38au Marxa Beret, includida laguens deth calendari FIS, e puntuable entath Circuit Popular Cross- Country Races, era Copa d’Espanha RFEDI e era Copa Catalana.
Es inscripcions van a bon ritme e ja compde damb mès de 400 inscriti, damb esportistes procedenti de tot eth mon.
Coma nauetat, enguan se celebrarà era pròva de skating, Sprint Salomon, en Arties.
Eth Conselh Generau d’Aran a acuelhut es reünions tecniques d’organizacion entà acabar de perfilar era 38au edicion dera Marxa Beret a on an assistit eth vicesindic d’Aran e director dera Marxa Beret, Luis Carlos Medina, representants de Baqueira Beret, eth president dera RFEDI, May Peus España, Pompièrs d’Aran, Mòssos d’Esquadra, e Era Escòla.
Eth dissabte, 4 de hereuèr, entàs 16:00 ores, aurà lòc era pròva de skating Sprint Salomon en Arties, ena zòna deth parcatge dera carretèra C-28.
Eth dimenge, 5 de hereuèr, se disputarà era 38au Marxa Beret, damb un circuit de 10Km ena zòna de Beret e Orri; de 21Km ena zòna de Beret, Orri e Montgarri e fin finau eth circuit de 42Km ena zòna de Beret, Orri, Montgarri e direccion Marimanha.
Era Marxa Beret ei ua des pròves d’esquí nòrdic mès assolidades que se realizen en territòri nacionau e que cada an compde damb mès de 1.000 participants provenenti de tota Euròpa. Aguesta marcha recupère eth sòn caractèr popular e a era intencion de convertir-se ena hèsta der esquí nòrdic.
Per açò, era organizacion compausada peth Conselh Generau d’Aran e pera estacion d’esquí aranesa Baqueira Beret, a prepausat ua sèria d’eveniments parallels ara Marxa Beret es quaus an coma objectiu que toti es sòns participants e seguidors gaudisquen d’ua agradiua dimenjada ena Val d’Aran.
Era Marxa Beret, qu’enguan arribe ara 38au edicion, data der an 1977. Era edicion deth 2017 ei includida laguens deth calendari FIS (Federacion Internacionau d’Esquí), ei pròva puntuable entath Circuit Popular Cross-Country Races, era Copa d’Espanha RFEDI e era Copa Catalana.
Es inscripcions se pòden realizar per Internet, a trauès dera pagina web dera Marxa Beret, www.marxaberet.com, enquiath 2 de hereuèr. Es inscripcions presenciaus auràn lòc ena Casa d’Acuelhuda, en Salardú, eth 4 de hereuèr.
Era Marxa Beret ei era pròva d’esquí de hons popular en estil classic mès multitudinària d’Espanha.
• Programa
– Dissabte, 4 de hereuèr
09h30 – Dubertura dera “Casa d’Acuelhuda”
16h00 – Exibicion «Sprint Salomon» en Arties
19h00 – Despartiment de prèmis
19h30 – Presentacion «38au Marxa Beret»
20h30 – Barrament d’inscripcions e dera Casa d’Acuelhuda
– Dimenge, 5 de hereuèr
10h00 – Gessuda 38au Marxa Beret
13h30 – Despartiment de prèmis
14h00 – Ceremònia de Clausura
14h30 – Barrament deth circuit
Vielha, 27 de gèr de 2017
Conselh Generau d’Aran: Núria Sanjuan