S’active eth Plan de Contingéncia der Espitau Val d’Aran deuant der aument d’ingrèssi per COVID-19

gèr 25, 2021 Notícies, Sanitat

  • Actuaument son 8 es persones ingressades, en tot superar es places disponibles en airau sociosanitari dedicat enquia ara ad aguest prètzhèt, motiu peth quau s’an auut de trasladar es ingrèssi COVID-19 ara planta d’ospitalizacion der Espitau Val d’Aran

  • Enes darrères 24 ores, s’an confirmat 21 naui casi positius per COVID-19

Eth numèro d’ingrèssi per COVID-19 a aumentat enes darrères ores enquia arribar en dia d’aué a 8 persones ingressades, des quaus ua se trape en estat grèu.

Atau donc, s’an superat es places disponibles en airau sociosanitari der Espitau, qu’a acuelhut enquia ara es ospitalizacions per COVID-19, e s’a procedit ath traslat dera planta COVID-19 ar airau d’ospitalizacion d’aguts.

Damb aguest cambi s’inícien tanben, en tot seguir damb eth Plan de Contingéncia elaborat pendent er inici dera pandemia, es trabalhs entà reorganizar e posposar es intervencions quirorgiques programades.

Eth govèrn deth Conselh Generau d’Aran rebrembe eth besonh seguir totes es mesures preventives establides pes autoritats sanitàries e recomane redusir ath maximom era interaccion sociau pendent aguestes setmanes.

Comments are closed.