Se met en foncionament Appias, era naua plataforma compartida d’accions formatives non reglades d’Aran, Naut Pirenèu e Solsonès

  • Aguest esturment s’a creat damb er objectiu d’ampliar era aufèrta formativa accessible entara ciutadania e palliar atau era dificultat de poder realizar formacions en aguestes zònes pr’amor dera manca de participaires

Eth passat diuendres, 17 de seteme, se metec en foncionament er esturment digitau Appias Formativa, que permeterà compartir era aufèrta formativa non reglada dera Val d’Aran e es comarques der Alt Urgell, Alta Ribagorça, Cerdanya, Pallars Jussà e Pallars Sobirà. Era sua creacion ei ua accion que s’emmèrque laguens des Projèctes Compartidi dera Reactivacion Transformadora que nèishen dera estrategia d’agendes compartides dera Diputació de Lleida i que prebotgen era realizacion d’actuacions conjuntes entre es diferents administracions.

Appias Formativa s’a creat damb era finalitat d’optimizar recorsi e ampliar es accions formatives que s’aufrissen ara ciutadania. Eth foncionament agil e intuitiu dera plataforma facilite dar-se de nauta enes entitats qu’aufrissen formacion non reglada e qu’es usatgèrs poguen realizar era inscripcion.

Ath delà, aguesta plataforma digitau servirà entà articular e gestionar ua base de donades de recorsi formatius compartidi e, ath madeish temps, es Centres Formadors poiràn difóner es sues aufèrtes formatives e arribar a mès poblacion activa dera Val d’Aran, eth Naut Pirenèu e eth Solsonès. D’aguesta manèra, serà mès facil poder implementar aqueri corsi que soent non se podien realizar pera manca de persones interessades.

Ei previst qu’eth pròplèu mes d’octobre, Aran, eth Naut Pirenèu e eth Solsonès impulsen de forma coordinada e damb supòrt deth Patronat de Promocion Economica dera Diputació de Lleida, ua accion formativa nomentada mentoria de negòcis digitaus dirigida ath teishut productiu d’aguesti territòris, impartida pera Agéncia Dicrea’t. A era finalitat de poder acompanhar as empreses d’ua manèra personalizada ena creacion o melhora deth sòn negòci digitau e favorir er escambi de coneishements entre es participaires.

Aguest projècte ei ua iniciativa impulsada peth Conselh Generau d’Aran e es Consells Comarcals en marc dera execucion des Plans de reactivacion socioeconomica en airau dera ocupacion finançadi peth SOC e damb eth supòrt dera coordinacion dera Oficina Tecnica entara Transformacion Economica des Tèrres de Lleida, Pirenèu, Aran e Solsonès. Eth son objectiu ei promocionar accions non reglades destinades a persones en situacion de caumatge, coma esturment entà facilitar era accessibilitat ath trabalh e entà persones emprenedores e trabalhadores que vòlen melhorar eth sòn rendiment.

Comments are closed.