Entronizacion dera imatge de Sant Ròc en Vilamòs

Vielha, 14 d’agost de 2018.- Eth pròplèu dia 15 d’agost, en tot coïncidir damb era Hèsta major de Vilamòs, debanarà era ceremònia entà méter en tròn era imatge de Sant Ròc, sant patron dera poblacion.

Era ceremònia anarà acompanhada d’ua missa cantada en aranés a cargue dera corau És Paoesses dera Associacion Es Paums, dirigida per Lúcia Mas.

Era talha ei òbra dera artista Antonio Fernández de Ortega e García de Acilu, escultor-policromador de Vitòria-Gasteiz, autor tanben dera imatge dera Mair de Diu de Montgarri.

Fernández de Ortega e Garcia de Acilu comencèc a trebalhar ena Val d’Aran hè més de quinze ans e ei er autor d’òbres coma: era restauracion dera Creu Processionau de Les, era còpia dera Mair de Diu de Mijaran, eth Devarament deth Crist de Mijaran damb es personatges de Nòste Sénher, Era Mare de Diu, Jusèp d’Arimatea, Nicodem e Sant Joan a tamanh naturau en tot préner coma referéncia eth Crist de Mijaran e es diferenti devaraments romanics der Atelier d’Erill e dera Val de Boí, eth Retaule de Mijaran damb es imatges de Jaime Ièr e eth Venerable Frai Joan de Vilamòs, era restauracion de Santa Lúcia, Sant Julià e era Mare de Diu de Garòs, o de Santa Anna damb era Mair de Diu mainada, Sant Ròc, era Mair de Diu deth Rosèr d’Aubert e Nòsta Senhora de Montgarri.

Era entronizacion  e era execucion dera naua imatge de Sant Ròc a estat possibla gràcies a es creadors  e coordinadors deth projècte e d’execucion dera imatge, eth president dera Associacion Es Paums Jusèp Antoni Castet Varela e Jèp de Montoya e Parra, vicepresident dusau dera Associacion Es Paums e Assessor en Cultura e Patrimòni deth Conselh Generau d’ Aran.

Er acte, que debanarà tas 13 ores ena glèisa de Santa Maria de Vilamòs, compdarà damb era preséncia de Joseph Geethafonkalan, rector de Vilamòs; deth sindic d’Aran, Carlos Barrera; de Francisco Castet Condò, baile de Vilamòs; e de Jusèp Antoni Castet, president dera Associacion Es Paums, entre d’auti.

Era entronizacion dera imatge de Sant Ròc a estat possibla gràcies ara collaboracion de diferentes institucions e particulars.

 

Comments are closed.