Compde ath darrèr entara hèsta dera nhèu mès relevanta des Pirenèus.

Era preséncia deth freerider aranés Aymar Navarro, bombons elaboradi peth mèstre pastissèr Oriol Balaguer, o era presentacion de cauçat e complements iuernaus dera colleccion capsula SarahWorld deth grop Sara Navarro, son bères ues des nauetats dera edicion de Snowfest Pirenèus 2015.

Era Val d’Aran se vestís de hèsta entà arrecéber era sason d’esquí d’enguan. Espòrt, musica, cinèma, mòda tecnica o gastronomia en un programa de dimenjada replet d’activitats restacades damb era nhèu, e entà toti es publics, en tot coïncidir damb era dubertura des pistes de Baquira-Beret.

Aymar Navarro

Era Associacion de Comerçants e Empresaris de Vielha, amassa damb Baqueira Beret, eth Conselh Generau d’Aran e diferenti ajuntaments dera Val d’Aran, organizen ua dimenjada de hèsta entà celebrar era arribada der iuèrn. Un programa complèt d’òci parallel a Winter Expo, un salon de materiau tecnic e de mòda d’iuèrn, qu’aurà lòc deth 27 ath 29 de noveme en Vielha, Baqueira-Beret, Salardú, Bossòst o Les. Er eveniment aufrís un programa replet d’activitats que rebaten es nauetats deth mon dera nhèu, er òci e era diversion.

“Aguest ei eth tresau an qu’organizam aguest eveniment, -explique eth President dera Associacion, Antonio Beso- damb un programa fòrça mès atractiu. Era nòsta intencion ei que cada an sigue melhor, mès divertit e mès complèt, e que s’assolide coma era melhor hèsta dera nhèu de tota Espanha e deth sud d’Euròpa”.

Snowfest 2015 arrincarà eth diuendres 27 de noveme damb era inauguracion oficiau en Vielha, presidida per Aymar Navarro, pairin dera edicion d’enguan, er alugat dera illuminacion de Nadau, era convocatòria d’un flashmob entà barar e propiciar era sason de nhèu o era dubertura dera rota de tapes per diferenti establiments de la Val d’Aran.

Eth dissabte 28 peth maitin s’inaugurarà era Winter Expo, un salon de materiau tecnic de nhèu e mòda d’iuèrn que per prumèr an acuelh a petiti fabricadors des Pirenèus e non sonque a granes mèrques deth sector.

Oriol Balaguer

Tanben en recinte de Winter Expo, plaçat en Palai d’Espòrts de Vielha, Oriol Balaguer, un des melhors mèstres pastissèrs d’Espanha presentarà eth Bombon Snowfest 2015 en ua degustacion publica. Era equipa de dessenh de SarahWorld, -mèrca joena deth grop Sara Navarro, cap deth sector de cauçat en Espanha-, presentarà tanben era colleccion capsula SarahWorld de sabates e complements d’iuèrn Eco-cold, Eco-chic damb era “première” dera Bossa Pirenèus, especiauments dessenhat peth Snowfest.

Era tarde deth dissabte arrincarà damb era projeccion deth vidèo “Searching the Line” d’Aymar Navarro, entà contunhar damb un espectacle de patinatge artistic que recree scènes d’“El Rey León”, eth concèrt deth grop indie-ròck Kid Wise e ua session de musica electronica damb eth DJ D-Yan.

Era artesania e era excellenta e substanciosa codina dera Val d’Aran meterà era nòta gastronomica damb ua exibicion e tast de productes damb era “Marca de Garantia Val d’Aran” eth dimenge 29, en un mercat artesanau plaçat ena Plaça dera Glèisa de Bossòst, ath costat des bars e locaus de restauracion que s’an somat ar eveniment e qu’aufriràn, entre autes mòstres deth ric receptari dera Val d’Aran, es sòns famosi “pintxos” o er “andito” e era “mongeta” de Bossòst.

E fòrça mès, pr’amor que i aurà tanben desfilades de mòda, eth balh ar estil Bollywood, passes de documentaus restacadi damb era nhèu coma era projeccion eth primícia d’Aguestes Montanhes, ioga, visites guidades per bères ues des mès bères glèises romaniques d’Aran e un long eca d’activitats entà toti es publics. Eth programa culminarà damb eth sorteg de forfaits entara estacion de Baqueira Beret, esquís, e ua plaça entà GORE-TEX Experience Tour, ua expedicion de Freeriding ath costat d’Aymar Navarro, que debanarà enes isles Lofoten en 2016 aufèrta per Copos Ski-Center.

Aguestes activitats son possibles gràcies ara colaboracion deth Conselh Generau d’Aran, Torisme Val d’Aran, Baqueira-Beret, es Ajuntaments de Vielha e Mijaran, Bossòst e Naut Aran, era Deputacion de Lhèida o eth Consòrci de Comèrç, Artesania e Mòda de Catalonha (Generalitat de Catalonha) e fòrça autes entitats e establiments colaboradors que s’an somat a ua celebracion dubèrta a toti, ua celebracion dera alegria, era natura e era nhèu.

Programa SNOWFEST 2015:

• Snowfest Pireneus… Benvengut ar iuèrn

Snowfest Pireneus ei un hestivau dera nhèu que neishec eth 2013 e qu’eth 2015 celèbre era sua tresau edicion deth 27 ath 29 de noveme, ena Val d’Aran (Lhèida), entà dar era benvenguda ar iuèrn enes Pirenèus.

Er eveniment diferéncie dus aspèctes: un Hestivau, damb activitats esportiues, ludiques, artistic-culturaus, musicaus e gastronomiques a trauèrs d’un complèt programa entà toti es publics que rebat era manèra de vida e es activitats de montanha mès destacada des Pirenèus centraus.

Ua hèira, damb eth salon d’iuèrn Winter Expo en Palai d’Espòrts de Vielha, a on s’exibiràn prumères mèrques de nhèu (ròba tecnica e materiau d’espòrt), mòda d’iuèrn, es prepauses d’òci de torisme iuernau e era presentacion des eveniments dera sason de nhèu.