14 micro espacis radiofonics que se pòden escotar ara carta ena web dera CCMA
Eth concors literari Mossèn Condò Sambeat qu’enguan celèbre era sua XXIX edicion, dedicarà er acte de liurament des prèmis eth 8 de junh de 2019 ath poèta aranés
Vielha, 26 d’abriu de 2019.- Eth departament de Cultura e Lengua deth Conselh Generau d’Aran a preparat ua seria d’accions e actes entà commemorar eth centenari dera mòrt deth poèta aranés Jusèp Condò Sambeat (1867-1919).
Es “Tastets de Cultura” son 14 micro espacis radiofonics damb tèxtes de Condò prepausadi peth departament de Cultura e Lengua deth Conselh Generau d’Aran en collaboracion damb eth programa de ràdio Eth maitin d’Aran dera CCMA. Es tèxtes s’an transcrit ara grafia normalizada, totun, s’a considerat important respectar quauqua grafia originau entà èster mès fidèus ara escritura de Condò.
Es “Tastets de Cultura” se pòden escotar ara carta a trauès dera web dera CCMA.
Aciu podetz escotar-ne un https://www.ccma.cat/catradio/alacarta/eth-maitin-daran/tastets-De-cultura-mossen-jusep-condo-sambeat-eth-pastor-as-estrelhes/audio/1037196 /
D’aute biais eth Conselh Generau d’Aran a abilitat un espaci ena sua web dedicat a Mn. Condò Sambeat https://www.conselharan.org/100-ans-dera-mort-deth-poèta-j-condo-sambeat/
En aguest espaci se tròben desparières prepauses qu’arrebremben ath poèta e escrivan aranés. Entre d’auti “Era isla des diamants” en pdf interactiu (version originau e normalizada). Un bon recuelh des òbres de Condò, titulat: “Er isla des diamants” siguec editat pera bibliotèca dera “Scolo deras Pirineos” en 1981, gràcies ath trabalh de Jules e Yvonne Ponsolle. Cau arrebrembar que bona part dera òbra de Condò hè part deth Hons dera Escola deras Pirineos qu’ei depositada enes Archives Départementales de la Haute Garonne, en Saint Gaudens, a on se pòden consultar es originaus.
Eth departament de Cultura e Lengua deth Conselh Generau d’Aran organizèc eth dia de Sant Jòrdi era conferéncia “Mission complida” sus era figura umana de Mn. Condò a cargue de Mn. Amiell.
Des deth madeish departament s’a confeccionat un quadèrn didactic damb illustracions de Thor Sanabria entà dar a conéisher a Condò enes escòles.
Fin finau, eth concors literari Mossèn Condò Sambeat qu’enguan celèbre era sua XXIX edicion, dedicarà er acte de liurament des prèmis eth 8 de junh de 2019 ath poèta aranés.
Mn. Condò Sambeat
Jusèp Condò Sambeat, neishec en Montcorbau eth 29 de març de 1867 e siguec ordenat caperan ara edat de 24 ans. Dempús d’èster destinat enes pòbles de Sallent, Gabassa e Moror, en 1905, as 38 ans, torne tara Val d’Aran en èster nomentat rector de Gessa, Salardú e mès tard de Bossòst. Damb eth sòn retorn ara Val d’Aran Condò establic ligams damb es vesins de lengua gascona e sustot damb eth sòn amic Bernard Sarrieu, fondador dera Scolo deras Pireneos, qu’er emparèc tà escríuer en aranés e presentar es sues poesies enes Jòcs Floraus.
Er amor ara tèrra que lo vedec nèisher, ath paisatge aranés, ara sua lengua e era sua gent, definissen era òbra de Condò que deishèc tanben per escrit costums araneses e condes deth país.
Jusèp Condò Sambeat siguec caperan, poèta e musician, considerat eth prumèr escrivan en utilizar er aranés coma lengua literària. Siguec collaborador de desparières publicacions literàries. Autor d’importants poèmes en occitan, tanben escriuec condes cuerti, roman e teatre. En 1912, guanhèc eth Prèmi des Jòcs Floraus de Tolosa damb eth poemari “Era Val d’Aran”. Dera sua vasta òbra destaque tanben eth “Vocabulari aranés”, publicat en 1915.
Jusèp Condò moric eth 5 d’agost de 1919 ara edat de 52 ans e siguec enterrat en Bossòst.
