• Efectius de Pompièrs-Emergéncies, trabalhadors d’Endesa e collaboradors de Deportur an trabalhar entà retirar per complet es rèstes d’idrocarbur, en tot esténer un materiau absorbent que se retirarà eth pròplèu dijaus e se tornarà a repetir era operacion enquia qu’er aigua sigue completament neta

Ua dotacion de Pompièrs-Emergéncies, trabalhadors d’ua empresa especializada contractada per Endesa e collaboradors de Deportur an trabalhat aguest maitin entà netejar es aigues confinades procedents der abocament accidentau de gasòil en Garona produsit ager en Arties.

Rebrembam qu’entà controlar aguest vertit e netejar per complet er aigua afectada, aguesta se desvièc des de Bossòst a trauès d’un canau entara presa de Toran, a on son retengudes es rèstes de gasòil.

En servici amiat a tèrme aguest maitin, gràcies ar embarcament balhat per Deportur, es efectius de Pompièrs-Emergéncies an podut esténer un materiau absorbent que se retirarà aguest dijaus entà que poguen èster processat per ua empresa especializada. Era operacion tornarà a repetir-se enquia assegurar-se qu’er aigua dera presa ei totaument neta.

Un còp mès, eth govèrn deth Conselh Generau d’Aran vò tornar a arregraïr er esfòrç amiat a tèrme aguesti dies per part de Pompièrs-Emergéncies, Mossos d’Esquadra, e des trabalhadors des depuradores e d’Endesa, atau coma era collaboracion des empreses Barba, Hormaran e Deportur.

Es Mossos d’Esquadra dauriren diligéncies entà investigar es hèts.