• Aguest maitin a auut lòc ua jornada de trabalh entre es organs assessors der aranés e deth catalan, qu’a compdat tanben damb era participacion de representants deth sector educatiu aranés, entà encetar ua etapa de contacte e consens en çò que hè as mesures que s’an de préner respècte dera lengua pròpia d’Aran, sustot en encastre der ensenhament

Aguest maitin a auut lòc era session de trabalh deth Conselh Consultatiu der Aranés damb eth Consell Lingüístic Assessor (deth catalan), entestada pes sòns representants, es lingüistes Jordi Suïls e Carme Junyent, e presidida pera sindica d’Aran, Maria Vergés, tà pr’amor d’encetar ua etapa de contacte e de consens en çò que hè as mesures que s’an de préner respècte dera lengua pròpia d’Aran, sustot en encastre der ensenhament.

Cau rebrembar qu’eth Conselh Consultatiu der Aranés ei un organ de diagnòsi e consulta en matèria de planificacion lingüistica depenent deth Conselh Generau d’Aran tà promòir era vitalitat sociau der aranés e concretar es accions politiques entara promocion, normalizacion e difusion dera lengua pròpia d’Aran, creat ara hè un an.

Peth sòn costat, eth Consell Lingüístic Assessor ei er organ encargat de conselhar ath Departament d’Educacion dera Generalitat en matèria deth tractament des lengües en ensenhament.

En aguesta session de trabalh, dubèrta ara comunitat educativa d’Aran, s’a consensuat e aprovat eth document elaborat peth Conselh Consultatiu der Aranés a partir des prepauses deth Consell Assessor deuant dera aprobacion dera Lei 8/2022 sus er usatge e aprendissatge des lengües oficiaus en ensenhament non universitari, a on s’elimine eth caractèr de “lengua veïculara e d’aprenedissatge” der aranés, en tot substituïr-lo per “lengua d’emplec curricular e educatiu abituau”.

Aguest document establís qu’es tèrmes enes qu’apareish er aranés deuant deth catalan en aguesta Lei “resulten en un tractament desparièr des lengües, e en particular dan un tractament segondari ar aranés en comparason damb eth catalan. S’er aranés ei lengua pròpria en Aran, çò que se ditz entath catalan en Catalonha aurie d’èster aplicat enes madeishi tèrmes ar aranés en Aran”.

Per aguest motiu, remasse tot un seguit de prepauses deuant aguesta situacion, d’idèes generaus a prepauses dirigides a professors e mèstres, sus eth projècte lingüistic, era acuelhuda o er entorn, hilat e plataformes.

Era sindica d’Aran a volut destacar “era importància qu’a poder establir sinérgies e complicitats damb un organisme coma eth Consell Lingüístic Assessor entà seguir trabalhant ena linha de dar supòrt ara escòla aranesa en matèria de lingüistica, pr’amor que, a despièch de non compdar damb competències dirèctes en educacion, ei era volontat deth Conselh Generau d’Aran continuar trabalhant amassa entà trapar es formules adequades entà dar impuls ar aranés ena escòla”.

Eth document consensuat ena jornada de trabalh d’aué se poirà consultar enes pròplèu dies ena plana web deth Conselh Generau d’Aran.